GlaxoSmithKline vlerëson Brexit – Kostot fillestare për prodhuesin e barnave do të arrijnë në mbi $100 mln

Gjiganti i farmaceutikës në Britani, GlaxoSmithKline,  vlerëson se kostot e lidhura me Brexit do të arrijnë në 70 milionë paund në 2 vitet e ardhshme. Sipas një raporti vjetor të kompanisë, përveç kësaj shifre, priten edhe kosto prej 50 milionë paund në vit.

Kjo është një nga llogaritë më të detajuara të kostove të mundshme të daljes së Mbretërisë së Bashkuar nga Bashkimi Europian deri më tani.

Prodhuesit globalë të barnave si Johnson & Johnson dhe AstraZeneca, kanë theksuar barrierat tregtare dhe rregullatore, në shtimin e kostove pas daljes në muajin Mars 2019.  Johnson & Johnson vlerësoi në Dhjetor se mund të përballet me 50,000  testime të produkteve në vit me kosto prej 1 milionë paund, nëse nuk ka njohje reciproke mes Britanisë dhe Bashkimit Europian.

Kostot e GlaxoSmithKline lidhen me ritestimin e barnave, transferimin e autorizimeve të marketingut në BE, ndryshimin e licencave të manifakturës dhe hapa të tjerë.  Prodhuesi i barnave deklaroi se ka nisur të zbatojë planin emergjencë në Janar, duke u fokusuar në zinxhiret e vet të furnizimit.

“Zbatimi i këtyre ndryshimeve komplekse deri në Mars të vitit 2019 do të jetë tejet ambicioz dhe do të krijojë ndërprerje në afat-shkurtër.  Ne përkrahim arritjen e një periudhe tranzicioni për të minimizuar këtë ndërprerje”, deklaroi GaxoSmithKline.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.