Godina e re e Mjekësisë – Ministria shpall vlerën e shpronësimit, mbi 9 milionë lekë
Shpallet vlera e shpronësimit për interes pubik të pasurive të paluajtshme, pronë private, që preken nga realizimi i projektit të shumë përfolur tashmë edhe në media për ndërtimin e godinës së re të mjekësisë së përgjithshme. Menjëherë pas kërkesës së Qendrës Spitalore Universitare “Nënë Tereza” për ngritjen e kësaj godine, Ministria e Shëndetësisë dhe Mbrojtjes Sociale shpalli kërkesën për shpronësim, me vlerë mbi 9 milion e 6 mijë lekë.
Sipas njoftimit të botuar në fletoren zyrtare, ky shpronësim, konsiston në masën e vlerësimit të llogaritur në bazë të çmimeve të miratuara me vendimin e Këshillit të Ministrave.
Ndërtimi i godinës së re të mjekësisë së përgjithshme parashikohet të jetë me 8 kate. Vetëm pak kohë më parë ministrja e shëndetësisë Ogerta Manastirliu vuri në dijeni për nevojën e ndërtimit të kësaj godinës së re për shëndetësinë.
Sipas njoftimit të bërë publik tashmë bëhet e qartë se për ndërtesat social-ekonomike, vlerësimi është bërë bazuar në çmimet njësi të zërave të punimeve referuar listës së çmimeve për vitin 2016, për qytetin e Tiranës, publikuar nga EKB-ja.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.