Godina historike e ministrisë së Bujqësisë në rikonstruksion! Hapet tenderi për konsulentin
Ministria e Bujqësisë dhe Zhvillimit Rural ka hapur tenderin për zgjedhjen e konsulentit për rikonstruksionin e godinës në Bulevardin Dëshmorët e Kombit. Fondi limit i tenderit është 3 milionë lekë dhe tenderi mbyllet me 31 janar 2020, raporton SCAN.
Qëllimi i detyrës së projektimit është hartimi i termave të referencës të zbatimit të objektit: “Shërbim konsulence – Projektim i rikonstruksionit të ambienteve të MBZHR” sipas normativave të projektimit për godina për funksion administrativ.
Godina e Ministrisë së Bujqësisë eshte nje prej disa ndërtesash historike të Tiranës, të shpallura monument kulture kategoria e dytë. Kjo ndërtesë i takon arkitekturës italiane. Është një ndërtesë 3 kT +1 kT bodrum, e ndërtuar me mure masiv konstruksion mbajtës.
Ndertesa ka një shtrirje rreth 41 metra paralel me bulevardin. Mjedisi kryesor përbëhet nga sallat e drejtorive dhe bordeve.
Stili dhe karakteri i ndërtesës është unik. I është kushtuar një vëmendje e vecantë detajeve të kornizës së parapetit dhe kornizave rreth dyerve dhe dritareve, gjithashtu dhe veprave të artit të instaluara në muret e jashtme të godinës.
Në jetëgjatësinë e saj, ndërtesa ka shfaqur probleme teknike komplekse përsa i përket rifiniturave dhe infrastrukturës së shërbimeve.
“Sa më sipër detyra e projektimit për përgatitjen e një projekti ka marrë në konsideratë dhe ka zgjidhur në mënyrën më të mirë dhe me efikase te gjitha kerkesat e parashtruara nga institucioni” shkruhet në dokumentet e tenderit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.