Goditja e ‘të fortëve’ – Rama: Së shpejti në Parlament projekti për krijimin e një force parandaluese

Qeveria do të dërgojë së shpejti në parlament një projekt për krijimin e një force parandaluese për të gjithë personat që kanë profile kriminale. Deklarata ka ardhur nga kryeministri i vendit, Edi Rama, gjatë fjalës së tij në ceremoninë e së vënies në përdorim të shërbimeve policore të 134 automjeteve të reja.

“Kemi një nevojë emergjente për reagimin ndaj të fortëve. Me shpejtësi do të çojmë në Parlament projektin e ri për krijimin e një force tjetër reagimi parandalues, e një force të shpejtë reagimi parandalues, një force superspeciale që do të merret në mënyrë të dedikuar me të gjithë ata që janë një bezdi për komunitetet dhe që kanë precedentë penalë, apo që kanë profile kriminale mbi të cilët duhet të ushtrohet përditë presioni parandalues i Policisë së Shtetit”, u shpreh Rama.

Ndërsa e cilësoi goditjen e të fortëve një sfidë të dyfishtë, Rama tha se 3 vitet e ardhshme duhet të jenë vitet e shkatërrimit të krimit të organizuar, duke shtuar se janë të gjitha kushtet për ta fituar atë.

Ndërkohë, duke u ndalur tek risitë teknologjike në Polici, Rama tha se monitorimi i qarkullimit rrugor tashmë do të bëhet nga një sistem kamerash që do të shtrihet në të gjithë vendin, dhe jo nga policët.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.