“Goldman Sachs” me plan të ri – Në 2020 do të hyjë në biznesin e menaxhimit të parasë “cash”

Goldman Sachs po vlerëson idenë si dhe po përgatit terrenin për të hyrë në një biznes të ri; atë të menaxhimit të parave cash. Gjigandi bankar do t`i japë më shumë para se kushdo tjetër kompanive të mëdha shumëkombëshe për depozitat e tyre.

Goldman Sachs është banka e 5-të më e madhe në Shtetet e Bashkuara të Amerikës, dhe prej 6 muajsh ka nisur instalimin e një teknologjie që të bëjë të mundur një projekt të tillë.

Shërbimi i ri do të fillojë prej gjysmës së parë të vitit 2020. Pra, banka do t`i japë klientëve të saj më shumë interesa për depozita e tyre, në rast se ato do të pranojnë të bëhen pjesë e planit të menaxhimit të parave nga ana e vetë bankës.

Ky lloj biznesi gjeneroi 250 miliardë dollarë përgjatë gjithë vitit 2017 ndërkohë që shumëkush e konsideron si një biznes me marzhe të ulta fitimi.

Pas krizës financiare globale, shumë banka u tërhoqën nga ky lloj biznesi, nga bankat e investimeve dhe tregtia e aksioneve. Tashmë interesi për këtë lloj biznesi është rikthyer.

Goldman do të jetë vetë klienti i parë i këtij shërbimi të ri duke zhvendosur brenda këtij viti depozitat që ka në bankat e tjera brenda platformës së saj të menaxhimit të parasë cash.

Goldman synon kështu të fitojë nëpërmjet këtij shërbimi të ri në tre mënyra: duke marrë tarifa për procesimin e fondeve, tarifa nëpërmjet shkëmbimit të parave cash të klientëve në valutë tjetër gjatë transaksioneve, si dhe duke përdorur depozitat si llogari bankare operacionale.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.