Goldman vazhdon optimist për naftën – Pret një rritje në 80 dollarë/fuçi në verë prej rritjes së kërkesës
Banka amerikane e investimeve, Goldman Sachs, pret që çmimet e naftës Brent të Londrës të arrijnë në 80 dollarë për fuçi gjatë Verës, duke vënë bast se rritja në tregun e naftës do të vazhdojë ndërkohë që vaksinimi i shpejtë nxit aktivitetin ekonomik botëror dhe kërkesën për naftë. Nafta Brent preku 72.93 dollarë për fuçi këtë Javë, që është niveli më i lartë në 2 vite, nxitur nga pritshmëritë për kërkesë të fortë. Ditën e fundit tregtare, Brent tregtohej në 72.2 dollarë, ndërsa nafta bruto amerikane (ËTI), në rreth 70 dollarë për fuçi. “Rritja e normës së vaksinimit ka sjellë një lëvizshmëri më të lartë në SHBA dhe Evropë, me kërkesën botërore që vlerësohej në rritje me 1.5 milionë fuçi në ditë në dy muajt e fundit, në një total prej 96.5 milionë fuçi në ditë” –deklaroi Goldman. Banka, që ka ekspertizë të vjetër në sektorin e lëndëve të para, vlerëson se rimëkëmbja e kërkesës për naftë pritet të vazhdojë dhe pret që kërkesa të arrijë 99 milionë fuçi në ditë gjatë Gushtit. Goldamn Sachs theksoi gjithashtu se progresi i ngadaltë në negociatat më Iranin për marrëveshjen bërthamore, pritet të frenojë ofertën e naftës dhe nxisë çmimet. Irani dhe fuqitë botërore kanë negociuar që prej muajit Prill për të hequr sanksionet ndaj Teheranit, që kanë goditur ekonominë duke ndërprerë eksportet e naftës. Sekretari amerikan i Shtetit, Anthony Blinken tha se pret që edhe nëse Irani dhe SHBA rikthehen drejt respektimit të marrëveshjes, qindra sanksione amerikane do të qëndrojnë.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.