“Gratë në shërbimin publik” – Meta: Institucionet t’i japin më shumë prioritet në punën e tyre
Presidenti i Republikës Ilir Meta mori pjesë në forumin për gratë në shërbimin publik. Gjatë fjalës së mbajtur në këtë forum, Meta vlerësoi reformën në administratën publike duke e quajtur “gur themeli” në krijimin e shtetit të së drejtës. Presidenti vlerësoi angazhimin egrave në administratën publike si tregues i emancipimit social në Shqipëri, ndërsa bëri një apel për institucionet, që t’i japin prioritet më shumë në punën e tyre.
“Reforma në administratën publike ka një rëndësi madhore jo vetëm si një “detyrë shtëpie” përsa i përket procesit të integrimit europian në BE, por mbi të gjitha sepse i shërben “memories institucionale” dhe është “gur themeli” në krijimin e shtetit të së drejtës, në përmbushjen e reformave strukturore dhe në garantimin e mirëqeverisjes, në interesin më të mirë të qytetarëve shqiptarë.
Më lejoni të bëj një apel për të gjitha institucionet shtetërore, për Parlamentin, për shoqërinë civile, për botën akademike, për mediat apo për sektorin privat të biznesit – që t’i japin prioritet më shumë në punën e tyre respektimit të lirive dhe të drejtave të grave dhe vajzave, sidomos të kontribuojnë në fuqizimin social dhe ekonomik të tyre.”
Në këtë aktivitet ishin të pranishëm ish-Presidentja e Republikës së Kosovës, znj.Ahtifete Jahjaga, deputete, përfaqësuese të institucioneve të ndryshme.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.