Greqia do bëhet më sociale – Plan masash prej 3.5 mld eurosh në vitin 2022

Ministri i Financave në Greqi, Euclid Tsakalotos, u shpreh së fundmi se, Greqia do ta arrijë objektivin për një suficit primar në 3.5% të Prodhimit të Brendshëm Bruto brenda vitit 2022 dhe në të njëjtën kohë do të ketë mjaftueshëm hapësira fiskale për të adoptuar masa pozitive, si p.sh ulja e kontributeve shoqërore si dhe ulja e taksave për biznesin.

Greqia, sipas Tsakalotos do të bëhet një shtet më social gjatë viteve të ardhshme pasi të gjitha masat e qeverisë do të fokusohen drejt këtij objektivi. Masat pozitive që sipas tij do të implementohen në vitin 2022 do të kapin shifrën e 3.5 miliardë eurove. Greqia vjen pas një krize mjaft të rëndë ekonomike që ka eliminuar ¼ e Prodhimit të Brendshëm Bruto.

Kriza u shoqërua edhe me një sërë masash shtrënguese që u ndien direkt në xhepat e qytetarëve. Tashmë që bilancet duket se janë rregulluar dhe që Greqia ka dalë nga tutela ndërkombëtare, gjërat duket se kanë mundësi të ndryshojnë për mirë në këtë drejtim.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.