Greqia kalon objektivat e kreditorëve – Pret një suficit primar prej 3.82% dhe rritje ekonomike me 2.5% në 2018

Greqia deklaroi se do të arrijë një suficit primar prej 3.82% në raport me PBB në 2018-ën , duke tejkaluar objektivat.

Plani i fundit i buxhetit të shtetit për 2018-ën i paraqitur në parlament këtë javë, projekton një rritje me 2.5% të Produktit të Brendshëm Bruto vitin që vjen, krahasuar me projeksionin prej 1.6% për 2017-ën.

Kreditorët e vendit kanë caktuar një objektiv më të ulët prej 3.5% vitin që vjen për suficitin primar, që përjashton kostot e shërbimit të borxhit.

Qeveria pret që borxhi publik të rritet në 179.8% të PBB vitin që vjen nga 178.2% këtë vit. Greqia, që ka marrë tre paketa të shpëtimit që prej vitit 2010, është një nga vendet me barrën më të lartë të borxhit në Eurozonë.

Paketa e fundit e shpëtimit përfundon në Gusht 2018, ku Greqia pritet të vetëfinancohet në tregje e jo të mbështetet në ndihmat e kreditorëve.

Vendi ka provuar tregjet financiarë këtë vit dhe lajmëroi javën e kaluar një këmbim të 20 emetimeve të vogla të obligacioneve për 5 tituj më mëdhenj.

Ministri i Financave, Euclid Tsakalotos tha se buxheti shënon daljen e vendit nga një periudhë e gjatë e programeve të përshtatjes makroekonomike.

Rimëkëmbja e Greqisë po bëhet gradualisht e qëndrueshme,  pas recesionit të vazhdueshëm që i ka hequr vendit 25% të outputit nga 2008 në 2016.

Duke kaluar objektivat e caktuara nga kreditorët, autoritetet greke kanë hapësirë për të ofruar benefite dhe mbështetje për një pjesë të popullsisë, që është dëmtuar nga ulja e pensioneve dhe taksat e mëdha.

Parlamenti miratoi një dividend social prej 1.4 miliardë euro që do ti shpërndahet grupeve më në nevojë këtë vit.

“Tejkalimi i objektivave ka risjellë besueshmërinë  në financat publike të Greqisë dhe ka hapur rrugën e rikthimit në tregjet ndërkombëtar”, tha Tsakalotos.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.