Greqia mban premtimet – Ofron përpjekjet e fundit për të reformuar sektorin publik

Qeveria e Greqisë prezantoi një plan 3-vjeçar për të ristrukturuar sektorin publik të vendit, që është përpjekja e fundit për të ndrequr një problem që e ka shtyrë vendin në krizë 7 vite më parë.

Greqia, që ka nënshkruar 3 programe të shpëtimit me Fondin Monetar Ndërkombëtar që prej vitit 2010, i ka premtuar huadhënësve se do të tkurrë dhe modernizojë administratën publike, për të ulur kostot dhe rritur eficencën.

Qeveria e majtë bëri të ditur se kërkon të vlerësojë dhe edukojë punonjësit shtetërorë, shpërndajë stafin në lidhje me nevojat e sektorit, të krijojë sisteme elektronikë të të dhënave dhe thjeshtëzojë rregullimin deri në vitin 2019.

Ministrja e Ristrukturimit të Administratës, Olga Gerovassili, premtoi se deri në vitin 2020, sektori shtetëror i Greqisë do të jetë i pavarur dhe i depolitizuar.

Pavarësisht reformave të vazhdueshme, sektori publik përballet me vështirësi, korrupsioni përbën ende një problem dhe përdorimi i sistemeve të të dhënave elektronike është i limituar.

Ristrukturimi ka qenë një detyrë e vështirë kryesisht prej rezistencës politike dhe të sindikatave. Përpara krizës financiare, sektori publik përbënte një parajsë për shumë punonjës grekë dhe elita politike e ka përdorur prej kohësh për të siguruar vota.

Ndër vite, situata u përkeqësua dhe në 2010-ën, kur u pranua programi i parë i shpëtimit, u ndërmor një sondazh ku u zbulua se rreth 20% e fuqisë punëtore të vendit punësohej në këtë sektor.

Sektori publik është tkurrur me rreth 18% që prej atëherë, tregojë të dhënat e Qeverisë, kryesisht prej daljes së hershme në pension dhe tavaneve të caktuara mbi punësimin.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.