Greqia merr lehtësimin e borxhit – Fiton zgjatje të maturiteteve me 10 vite, 15 mld euro kredi të reja

Ministrat e Financave të Eurozonës kanë zgjatur në kohë maturitetet dhe pagesën e interesit të një pjese të kredive ndaj Greqisë dhe kanë mundësuar një injektim të madh të parasë për të siguruar që Athina të ketë kapacitet kur të mbarojë programin e shpëtimit në Gusht.  Greqia është financuar kryesisht me para të marrë hua nga Qeveritë e Eurozonës në 3 paketat e shpëtimit që prej vitit 2010, kur humbi akses në treg për shkak të deficitit të madh buxhetor, borxhit publik dhe situatës së rënduar ekonomike.

Ndërkohë që pjesa më e madhe e reformave të kërkuara nga kreditorët është përfunduar,  Greqia ka bërë progres,  por që të rifitojë akses në tregje,  investitorët duhet të sigurohen se nuk do të pësojë kolaps nga shërbimi i barrës së madhe të borxhit prej 180% të Produktit të Brendshëm Bruto.  “Pas 8 vitesh të vështira, Greqia do të largohet më në fund nga ndihmat financiare”, tha kryetari i ministrave të financave të Eurozonës, Mario Centeno.

Elementi kryesor i lehtësimit të borxhit është zgjatja e maturiteteve dhe periudhës së faljes me 10 vite për 96.9 miliardë euro kredi të dhëna në programin e dytë të shpëtimit, për të zbutur vështirësitë e shërbimit të borxhit. Greqia do të përfitojë gjithashtu 15 miliardë euro kredi të reja, që do ta çojnë sasinë totale të parasë me të cilën do të dalë nga programi i fundit të ndihmave në Gusht, në 24.1 miliardë euro.  Kjo do t’i japë pavarësi nga financimi në tregje për rreth 22 muaj, sipas minsitrave të eurozonës.

Për të ofruar inventiva për qeveritë e ardhshme në Athinë që të mos përmbysin reformat e vështira që ka zbatuar gjatë ndihmave,  ministrat e Eurozonës ranë dakord që t’i ofrojnë Greqisë pagesa në cash prej 600 milionë euro çdo 6 muaj deri në vitin 2022. Fondi Monetar Ndërkombëtar e mirëpriti marrëveshjen duke thënë se do të përmirësojë qëndrueshmërinë e borxhit grek në afat-mesëm.  Ndryshe nga 2 paketat e para, FMN nuk i’u bashkua programit të fundit të Greqisë me kreditë e veta, por do të vazhdojë të monitorojë performancën e Greqisë, paralelisht me Eurozonën.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.