Greqia nuk prodhon punë – Papunësia bie me vetëm 0.1 pikë, më e larta në Europë
Norma e papunësisë në Greqi pësoi një rënie minimale gjatë muajit maj, në vetëm 21.7%, nga 21.8% që ishte muajin paraardhës, thonë të dhënat e fundit nga zyra e statistikave në vend.
Përmirësimi në tregun e punës rezulton tepër modest, dhe Greqia vijon të ketë normën më të lartë të papunësisë në Eurozonë, me diferencë të ndjeshme nga ndjekësit, Spanja dhe Italia.
Të dhënat tregojnë kështu se, numri i të papunëve në vend ka prekur 1.03 milionë banorë.
Më të goditurit janë të rinjtë, të moshës 15 deri në 24 vjeç. Pavarësisht kësaj, në këtë grupmoshë papunësia ka rënë në 44.4%, nga 49.7% që ishte gjatë së njëjtës periudhë të një viti më parë.
Norma e papunësisë në Greqi preku rekordin historik prej 27.9% në Shtator të vitit 2013. Që prej asokohe, përmirësimi ka qenë minimal dhe Greqia ka pasur vazhdimisht një papunësi dy herë më të lartë se mesatarja europiane.
Në të 19 vendet e eurozonës, papunësia ra në 9.1% gjatë Qershorit, duke prekur nivelin më të ulët që prej shkurtit të 2009.
Veçse të krijojë vende pune, Greqia po dështon të prodhojë edhe statistika, të cilat mbeten mjaft të vjetra në krahasim me pjesën tjetër të Europës.
Shifrat e sapopublikuara i referohen muajit Maj, ndërkohë që pak ditë më parë u raportua se zyra e statistikave ka pezulluar pa afat publikimin e rritjes ekonomike paraprake.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.