Greqia privatizon operatorin e gazit për gjysmë miliardi euro – Fiton garën konsorciumi i drejtuar nga SNAM

Operatori shtetëror i gazit në Greqi, “DESFA”, është në prag të shitjes së 66% të aksioneve të tij drejt konsorciumit të përbërë nga operatori italian i gazit “SNAM” (60%), “Enagas” e Spanjës (20%) dhe “Fluxys” i Belgjikës (20%).

Fondi shtetëror për privatizimin e aseteve, TAIPED, ka aprovuar ofertën prej 535 milionë eurosh të konsorciumit, duke e rekomanduar si investitorin e preferuar. Kjo ka ndodhur pavarësisht se tre kompanitë europiane nuk kanë përmirësuar ofertën e tyre, siç kishte kërkuar TAIPED më herët gjatë javës.

Operatori grek i naftës ELPE do të heqë dorë nga 35% të aksioneve të tij tek DESFA, ndërsa edhe shteti do të heqë dorë nga 31 përqindëshi i tij. Kjo do të mundësojë që konsorciumi të rrisë investimet në sektorin e gazit në Greqi, duke forcuar rrjedhimisht edhe korridorin jugor të energjisë në Europë, i cili po ngrihet mbi Gazsjellësin Adriatiko-Jonian.

DESGA kontrollon aktualisht një rrjet tubacionesh prej 1,459 kilometrash, i cili shtrihet në drejtim të kufirit me Bullgarinë dhe Turqinë. Ndër asetet e kompanisë përfshihet edhe një terminal gazi në një ishull të vogël në afërsi të Athinës. Por mbi të gjitha, Greqia gjendet në një kryqëzim të rëndësishëm të rrugëve të furnizimit me gaz natyror.

Transaksioni pritet të finalizohet në gjysmën e dytë të vitit, pasi të merret aprovimi nga rregullatorët në vend. Shitja e pjesës më të madhe të aksioneve tek DESFA ishte pjesë e paketës së fundit të shpëtimit të Greqisë, e cila kishte një vlerë prej 86 miliardë eurosh.

Gjatë vitit 2016, për DESFA kishte mbërritur edhe një ofertë prej 400 milionë eurosh nga kompania shtetërore e gazit në Azerbajxhan “SOCAR”.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.