Greqia rrit pagën minimale me 11%, gati pas një dekade nga fillimi i krizës së borxheve
Kryeministri grek Alexis Tsipras njoftoi në fillim-javë se planifikon të rrisë pagën minimale mujore me rreth 11 për qind, rritja e parë e tillë që nga kriza e borxhit të vendit që shpërtheu pothuajse një dekadë më parë.
Greqia ka dalë në gusht nga marrëveshja e saj e tretë ndërkombëtare e financimit që nga viti 2010, dhe qeveria që përballet me zgjedhjet kombëtare këtë vit ka premtuar të ndryshojë disa nga reformat jo të pëlqyeshme.
“Unë ju bëj thirrje që të merrni një hap tjetër historik pas një dekade të shkurtimeve të pagave”, tha Tsipras, duke i kërkuar qeverisë së tij të miratojë propozimin e Ministrisë së Punës për të ngritur pagën minimale në 650 euro nga 586 euro për momentin.
Tsipras, i cili nënshkroi ndihmën e tretë financiare për Greqinë në vitin 2015, gjithashtu propozoi heqjen e pagës minimale për të rinjtë nën 25 vjeç, shkruan economic.bg.
Ministrat e duartrokitën dhe Tsipras i qeshur u përgjigj: “Nga reagimi juaj, mendoj se propozimi im është … aprovuar”.
Plani duhet të miratohet nga parlamenti në ditët në vijim për të hyrë në fuqi muajin e ardhshëm, siç shpreson qeveria.
Athina u ka thënë kreditorëve të saj evropianë se do të rivendosë procesin e rritjes së pagës minimale pas përfundimit të planit të shpëtimit.
Rritja e propozuar u negociua pas konsultimeve midis qeverisë, punëdhënësve dhe sindikatave.
Greqia e uli pagën minimale mujore standarde me 22 për qind në 586 euro në 2012 kur ishte në një recesion.
Vendi pret rritje ekonomike prej 2.5% këtë vit. Përveç kësaj, papunësia pësoi rënie në 18.2% në vitin 2018 krahasuar me 19.6% vitin paraardhës.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.