Grevë hekurudhore në Britaninë e Madhe – 4 trena në pesë nuk do të bëjnë asnjë lëvizje

Britania e Madhe po përjeton grevën më të madhe të 30 viteve të fundit në sektorin e hekurudhave. Me mijëra anëtarë të stafit kërkojnë rritje page, siguri dhe kushte më të mira pune.

Sindikatat kërkojnë një rritje page prej 7% ndërsa kompanitë kanë rënë dakord vetëm deri në 3%, dhe vetëm me kushtin që sindikatat të pranojnë shkurtimin e vendeve të punës dhe modifikimin e orareve.

Greva ka nisur në mesnatë dhe janë përfshirë më shumë se 40 mijë persona të cilët paralajmërojnë se do të zgjasë deri të dielën, duke paralizuar në këtë mënyrë rrjetin hekurudhor. Dhe metroja e Londrës ka pezulluar çdo shërbim për shkak të grevës.

Kryeministri britanik Boris Xhonson, nën presion për të bërë më shumë për të ndihmuar familjet që të përballen me krizën ekonomike, u shpreh se greva do të dëmtojë biznese që sapo kanë filluar të rimëkëmben nga pandemia.

Sindikatat shprehen se ky është vetëm fillimi i asaj që e kanë pagëzuar si “vera e të pakënaqurve”, duke paralajmëruar se dhe mësuesit, mjekët e shumë profesionistë të tjerë janë gati për të hyrë në grevë në shenjë proteste për rritjen e çmimit të karburanteve në një moment që inflacioni në vend është në nivelin 10%.

Kryeministri Xhonson akuzoi sindikatat se në të vërtetë po dëmtonin njerëzit që pretendojnë se mbrojnë. Qeveria britanike është kritikuar ashpër nga opozita pasi nuk pranoi që të përfshihej në bisedime për të gjetur një zgjidhje për situatën e krijuar. Por Xhonson këmbëngul se është detyra e sindikatave të komunikojë drejt për së drejti me nëpunësit.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.