Guroret e Krujës – Ministria nis revokimin e 4 lejeve, në Krastë-Verjon do hiqen të gjitha

Ministria e Infrastrukturës dhe Energjisë ka nisur procedurat për revokimin e 4 lejeve minerare në zonën e Krujës. Gjithçka bazohet në një vendim qeverie, të miratuar në korrik të këtij viti, i cili parashikon shpalljen e zonën Krastë-Verjon peizazh natyrore të mbrojtur.

Në bazë të legjislacionit në fuqi, në të gjitha zonat që gëzojnë këtë status, zbatohet shkalla e mbrojtjes që ka si objekt kryesor eliminimin, ku është e domosdoshme, dhe parandalimin e përdorimit të tokës dhe kryerjen e aktiviteteve që janë të papërshtatshme në përmasa apo përmbajtje.

Të 4 subjektet, për të cilat ka nisur procesi i revokimit janë të pajisur me leje për mineralin e gurit gëlqeror, ndërkohë që sipas Ministrisë së Infrastrukturës dhe Energjisë, ky proces do të vazhdojë për revokimin e të gjitha lejeve minerare që ndodhen në zonën “Krastë-Verjon”.

Guroret, së bashku me furrat e gëlqeres në këtë zonë kanë qenë një shqetësimi i vazhdueshëm për banorët, për shkak të ndotjes që shkaktonin, ndërkohë që edhe ekspertët e shëndetit publik herë pas here kanë deklaruar se ajo shkaktojnë dëme në shëndet.

Ndërkaq, sipas një analize të Ministrisë së Turizmit dhe Mjedisit, nga 287 leje mjedisore dhe minerare për guroret që janë dhënë në të gjithë vendin pothuajse në të gjitha ato rezulton se ka problematika në zbatimin e lejes mjedisore dhe lejes minerare; në vendosjen e koordinatave; në trajtimin e mjedisit dhe në trajtimin e peizazhit.

Lejet minerare që do revokohen

1. Leja minerare Nr.926/1, date 09.03.2003 për mineral gur gëlqeror, në objektin “Krastë e Ziltës”, Krujë, zotëruar nga subjekti “Latomia Tirana” sh.p.k për arsye se nuk është zhvilluar aktiviteti minerar në zonën për të cilën është dhënë leja minerare në fjalë.
2. Leja minerare Nr.708, datë 08.07.2003, për mineral gur gëlqeror në objektin “Pengile”, Krujë, zotëruar nga subjekti “Karaj” sh.p.k
3. Leja minerare Nr.666/1, datë 19.03.2012, për mineral gur gëlqeror në objektin “Makaresh”, Krujë, zotëruar nga subjekti “Makaresh” sh.p.k
4. Leja minerare Nr.899, datë 08.08.2005, për mineral gur gëlqeror në objektin “Krastë”, Krujë, zotëruar nga subjekti “Babasi -2” sh.p.k.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.