Guvernatori i Bankës së Greqisë: Ekonomia në ‘rrugë të mbarë’, në 2018 PBB parashikohet të rritet me 2.4%
Ekonomia greke është në një trajektore të qëndrueshme, por nuk ka vend për vetëkënaqësi apo zbutje të përpjekjeve, tha të enjten guvernatori i Bankës së Greqisë, Yannis Stournaras, në një aktivitet të organizuar nga Dhoma Britanike-Helenike e Tregtisë.
“Ekonomia greke është aktualisht në një udhë drejt zhvillimit. Tani është e sigurt të parashikohet se aktiviteti ekonomik do të vazhdojë të rritet me një ritëm më të shpejt në termat afatshkurtër. Në vitin 2017 në tërësi, Banka e Greqisë vlerëson se PBB-ja do të rritet me rreth 1.7 për qind, ndërsa në 2018 dhe 2019, rritja parashikohet të përshpejtojë ritmin dhe të rritet në 2.4 për qind dhe 2.7 për qind, të nxitur nga rritja e investimeve, konsumit dhe eksporteve e mallrave dhe shërbimeve”, tha guvernatori.
Parashikimet e bankës qendrore bazohen në supozimin se programi i reformës dhe privatizimit do të zbatohet në mënyrë konsistente dhe sipas planit.
Ai kërkoi gjithashtu një përfundim të shpejtë të shqyrtimit të performancës të programit të shpëtimit, duke paralajmëruar se vonesat, siç ishte rasti me shqyrtimet e para dhe të dyta, duhet të shmangen.
“Vonesat mund të shkaktojnë një cikël të ri të pasigurisë, duke çuar në pezullimin e planeve të investimeve dhe duke minuar momentin e rritjes ekonomike. Kjo do të dobësonte perspektivat për qasje të qëndrueshme të sovranit grek në tregjet ndërkombëtare të kapitalit pas përfundimit të programit (shpëtimit) në gusht 2018,” tha Stournaras.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.