Guvernatori Sejko dhe Drejtori i AMF-së, Mete takim: “Bashkëpunim më i fortë institucional për rritjen dhe fuqizimin e tregjeve”
Situata në tregjet financiare dhe efektet e pandemisë së COVID-19 mbi subjektet e mbikëqyrura ka qenë tema e takimit midis Drejtorit të Përgjithshëm Ekzekutiv të Autoritetit të Mbikëqyrjes Financiare, Z. Ervin Mete dhe Guvernatorit të Bankës së Shqipërisë, Gent Sejko.
Dy institucionet e rëndësishme financiare kanë pasur një rol aktiv në amortizimin e goditjeve nga kriza e COVID-19 dhe për këtë arsye bashkëpunimi ndërmjet tyre në këto momente duhet të jetë më i fortë se kurrë. Ky është edhe zotimi që dy drejtuesit kanë bërë ndaj njëri-tjetrit për të rritur dhe forcuar sistemin financiar, si edhe të garantojnë një mbikëqyrje të konsoliduar mbi tregjet.
Në takim është diskutuar edhe mbi tema të tjera me rëndësi siç është krijimi i komiteteve të përbashkëta dhe finalizimin e Marrëveshjes së Mbikëqyrjes së Konsoliduar:
“Gjatë takimit u diskutua mbi shkëmbime të ndërsjellta në kuadër të Grupit Kombëtar të Stabilitetit Financiar dhe krijimin e komiteteve të përbashkëta në kuadër të zhvillimit të tregjeve, trajtimin e krizave dhe situatave të jashtëzakonshme dhe bashkëpunimin në funksion të luftës kundër pastrimit të parave.
Gjithashtu në takim u ra dakord për finalizimin e Marrëveshjes së Mbikëqyrjes së Konsoliduar mes Bankës së Shqipërisë dhe AMF.” – njofton zyra për shtyp e AMF-së.
G.K / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.