“Hakmerret” Pekini – Kina nuk do të njohë më pasaportat britanike
Pekini ka kërcënuar “të hakmerret” pasi Britania zgjati të drejtat e qëndrimit për miliona qytetarë të Hong Kong-ut, të kualifikuar për Pasaportën Kombëtare Britanike.
Kina është shprehur nëpërmjet një njoftimi zyrtar se nuk do të njihte Pasaportën Kombëtare Britanike (BNO) si një dokument të vlefshëm identifikimi, duke nisur që nga data 31 janar. Njoftimi erdhi ndërsa Britania po përgatitet të hapë dyert për miliona banorë nga Hong Kong pas ligjit të sigurisë kombëtare të Kinës.
“Nga 31 janari, Kina nuk do të njohë më të ashtuquajturën pasaportë BNO si një dokument udhëtimi dhe dokument ID dhe rezervon të drejtën për të ndërmarrë veprime të mëtejshme” u tha gazetarëve zëdhënësi i Ministrisë së Jashtme, Zhao Lijian.
Vendimi i Pekinit për të vendosur një ligj të sigurisë kombëtare në qershor 2020 bëri që qeveria e Mbretërisë së Bashkuar të ofrojë vitin e kaluar strehim për ata që vinin nga Hong Kong-u, të kualifikuar për pasaportën BNO.
Burimi origjinal: Deutsche Welle
Përshtati në shqip: SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.