Hapa para në luftën ndaj evazionit fiskal – Shqipëria përfshihet në kornizën e OECD, merr angazhime serioze
Organizata për Bashkëpunim Ekonomik dhe Zhvillim (OECD), njoftoi se Shqipëria është bërë anëtarja e 133-të e kornizës përfshirëse për shmangien e taksave, e njohur shkurt si BEPS. Me përfshirjen në listën e OECD, Shqipërisë tanimë i lejohet të marrë pjesë në diskutimet e organizatës në rishikimin e sistemit ndërkombëtar të taksave.
Por, duke u bërë pjesë e kornizës, Shqipëria merr përsipër edhe një sërë përgjegjësish, siç është edhe angazhimi për të adoptuar dhe monitoruar implementimin e standardeve minimale në taksimin e kompanive shumëkombëshe. Këto standarde minimale detyrojnë Shqipërinë që të mbledhë raporte në shumë shtete për grupet shumëkombëshe si dhe të shkëmbejë raportet me vendet e tjera, në mënyrë që të shmangë praktikat e cilësuara si të dëmshme, që këto kompani përdorin për të shmangur taksat.
Nga përfshirja në këtë kornizë rrjedhin edhe një sërë detyrimesh të tjera, ndërkohë që vendi ynë përfiton nga angazhimi në Organizatës për Bashkëpunim Ekonomik dhe Zhvillim si një vend që kërkon ta luftojë evazionin fiskal. Kompanitë e mëdha shumëkombëshe në botën e sotme janë kthyer në simbolin e atyre që shmangin taksimin, duke shfrytëzuar sistemet fiskale të favorshme në shumë vende.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.