Hapen aplikimet për subvencione në bujqësi/ Fermerët, një muaj afat. Kriteret që duhet të plotësojnë dhe masa e financimit

Agjencia për Zhvillimin Bujqësor dhe Rural ka hapur aplikimet për fermerët me qëllim subvencionimin në disa sektorë. Fondi i vënë në dispozicion këtë vit është 3.2 miliardë, ku rreth 1 miliardë lekë do të shkojë vetëm për naftën falas që do të përdoret në bujqësi. Skema Kombëtare e këtij viti parashikon mbështetje për bujqësinë, kryesisht për inputet bujqësore nga 200-500 mijë lekë për hektarë,  serat diellore ku subvencionohet në 50% të vlerës totale të faturave tatimore por jo më shumë se 13 milionë lekë për hektarë, bimët aromatiko mjekësore 60 mijë deri në 1 milionë lekë për hektarë, dhe 100-200 mijë lekë për fermat organike .

Në blegtori, përcaktohet se për tufën bazë të matrikulluar (kafshët riprodhuese), për fermat me jo më pak se 100 krerë dele dhe/ose dhi, mbështetja është në vlerën 1 200 lekë/krerë, por jo më shumë se 360 mijë lekë për subject. Ndërsa për fermat me jo më pak se 10 krerë lopë, jepet mbështetje në vlerën 10 mijë lekë/krerë, por jo më shumë se 500 mijë  lekë për subject. Financim është parashikuar gjithashtu edhe për  bletarinë me 1 mijë lekë për zgjua për ferma me jo më pak se 50 zgjoje si dhe do të mbështetet  rinovimi dhe blerja e anijeve të peshkimit.

Mbështetja në këtë sektor është nga 1 deri në 20 milionë lekë. Për ndërtimin e tregjeve të produkteve bujqësore dhe/ose tregjeve të kafshëve të gjalla për shoqëritë aksionare me kapital 100% shtetëror,  ofrohen subvencione në vlerën e  30 milionë lekëve.

Sipas udhëzimit, për disa nga masat e mbështetjes fermerët do të mund të aplikojnë vetëm me vetëdeklarim përmes e-albania, pa dorëzuar asnjë dokument, ndërsa për një pjesë të masave aplikimi bëhet me dosje fizike pranë AZHBR. Përfitues mund të jenë fermerët individual apo grupe fermerësh, dhe kusht është pajisja me nipt. Po ashtu, fermerët duhet të kenë bërë shlyerjen koherente të sigurimeve shoqërore të sigurimeve shoqërore.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.