Hapësira ligjore/ Tatimori ndërron gjininë që të dalë në pension 5 vite më herët! Plasin polemikat
Një funksionar publik ka vendosur që të shfrytëzojë paqartësinë që ofron ligji për të përfituar më herët pensionin. Sergio Lazarovich nuk është shquar si i varur nga puna. Madje është e kundërta e sipas kolegëve të tij, funksionari i tatimeve në Argjentinë ka kaluar më shumë kohë pushim sesa në zyrë.
Skema e fundit e ideuar nga 60 vjeçari është e pazakontë: punonjësi i Saltas, një qytet në veri-perëndim të Argjentinës, ndryshoi gjininë e tij në zyrën e gjendjes civile duke e bërë emrin nga Sergio në Sergia, për të shfrytëzuar ligjin që lejon gratë që të dalin në pension në moshën 60 vjeçare.
Paqartësia e ligjit
Duke cituar mediat e Agjentinës, “Corriere” shkruan se si rregull Lazarovich duhej të kishte punuar edhe 5 vite të tjera, por ndryshimi i gjinisë i ka lejuar që ta lerë punën më herët e të përfitojë pensionin. Ai ka shfrytëzuar dykuptimësinë e ligjit të vendit amerikano-jugor që parashikon të drejtën e transgender për të ndryshuar gjininë e tyre në regjistrat e gjendjes civile pa pasur detyrimin që të dëshmojnë se i janë nënshtruar operacionit.
Lazarovich ka qenë i martuar dhe është divorcuar dy herë, ka fëmijë e aktualisht jeton me një grua më të re se ai. Kjo histori ka indinjuar vendin e mbi të gjitha nuk i ka pëlqyer kolegëve të tij të punës. Indinjata ka përfshirë edhe punonjësit e Gjendjes Civile, drejtuesi i të cilës ka deklaruar se në këtë rast kemi të bëjmë me një abuzim me të drejtat e pensionit dhe me ligjin mbi identitetin.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.
Artikujt e fundit
