Hapet aksioni i pastrimit dhe gjelbërimit në aksin Rinas-Krujë, Klosi: Të punojmë së bashku për një Shqipëri të pastër
Në afërsi të kthesës së Rinasit, nisi sot aksioni dy ditor i pastrimit të aksit Rinas –Krujë, organizuar nga Ministria e Turizmit dhe Mjedisit në bashkëpunim me Ministrinë e Mbrojtjes, Ministrinë e Arsimit, Ministrinë e Kulturës, Bashkinë Tiranë, Durrës, Krujë.
Në hapjen e aksionit ishin të pranishëm ministri i Turizmit dhe Mjedisit Blendi Klosi, ministrja e Kulturës, Mirela Kumbaro, kryetari i bashkisë Tiranë, Erion Veliaj dhe kryetari i Bashkisë Durrës, Vangjush Dako.
Ministri Klosi në fjalën përshëndetëse për qindra punonjës, forcat e armatosura, vullnetarët përfaqësuesit e shoqërisë civile, theksoi rëndësinë e këtij aksioni që vjen në vigjilje të vitit të Skënderbeut dhe në kuadër të operacionit mbarëkombëtar “Pastrojmë Shqipërinë që duam”.
“Sot është një ditë e veçantë, një ditë e cila duhet të mbahet mend gjatë pasi kemi bërë së bashku një grup shumë të madh vullnetarësh të cilët duan që me rastin e vitit jubilar të Skënderbeut, ne të kemi mundësinë që së bashku të pastrojmë atë pjesë të territorit i cili përfaqëson një nga pikat më të bukura të Shqipërisë, një nga pikat më turistike, që e vizitojnë kaq shumë turistë, por që realisht ka nevojë për t’u bashkuar të gjithë dhe për ta pasur atë të pastër. “- tha ministri Klosi duke shtuar se ka ardhur koha që të kuptohen shkaqet e papastërtive të krijuara në vite dhe se aksioni i një dite është mjaft i rëndësishëm por i pamjaftueshëm. “Në kuadër të operacionit “Pastrojmë Shqipërinë që duam” ne duhet të kuptojmë se nuk mjafton vetëm operacioni i një dite, por duhet të kuptojmë shkaqet përse na krijohen këto papastërti, duhet të kuptojmë shkaqet sesi landfillet në të gjithë zonën janë të pambuluara të pa trajtuara, dhe mjafton një reshje shiu dhe ato të dalin të gjitha në pah. Prandaj sot do të doja të falenderoja jashtë mase të tre kryetarët e bashkive që janë angazhuar në këtë aksion që bashkë me ministren Kumbaro, me deputetët e zonës, ne arritëm që të bënim kaq shumë miq të ambientit të së bashku dhe të kemi sot jo vetëm kryetarin e Bashkisë Tiranës, Durrësit e Krujës, por shumë më tepër se kaq, shumë më tepër vullnetarë, njerëz të shoqërisë civile dhe në dy ditë, nga kthesa e Rinasit deri në kalanë e Krujës ne të kemi një pastrim perfekt, por po ashtu edhe rehabilitimin e shumë problemeve që ka kjo zonë.”– u shpreh kreu i Turizmit dhe Mjedisit.
Pasi iu referua zonave ku do të zhvillohej pastrimi, ministri Klosi bëri një apel për qytetarët e zonës që të përfshihen në aksionin dyditor. “Do të pastrojmë tre urat që janë problematika shumë të mëdha dhe shtratin e lumit dhe që lidh urat. Dhe nga sot vullnetarët do të nisen drejt malit të Krujës për të pastruar segmentin nga dalja e Fushë Krujës deri në Krujë dhe nesër do të përqendrohemi në atë segment për të pastruar të gjithë territorin e kalasë. Ne do të jemi gjatë gjithë ditës me ju dhe do të donim shumë qytetarët e Fushë Krujës dhe Krujës e më gjerë të bashkohen me ne, pasi operacioni më i madh është për të nxjerrë pastërtinë që kemi brenda shtëpive tona, në oborr, në lagje e kudo ku ne jetojmë.”
Gjatë aksionit dyditor do të punohet për pastrimin, rehabilitimin dhe gjelbërimin e zonës Rinas-Krujë. Në këtë aksion janë angazhuar punonjës të ministrive të Mbrojtjes, Turizmit dhe Mjedisit, Kulturës, tre bashkive, efektiva të ushtrisë, vullnetarë, aktivistë të shoqërisë civile dhe qytetarë. Aksioni i pastrimit do të konsistojë në disa nivele si: Pastrimin dhe thellimin e shtretërve të lumenjve, pastrimin e akseve kombëtare nga mbeturina, pastrimin e Kalasë së Krujës dhe kontrollin e bizneseve të zonës për lejet mjedisore nga ana e Inspektoriatit Shtetëror të Mjedisit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.