Hapet gara për 7 licenca transmetimi për radio – Ja frekuencat e lira dhe qarqet përkatëse
Autoriteti i Mediave Audiovizive ka shpallur zyrtarisht të hapur garën për dhënien e 7 licencave të transmetimit audio analoge private rajonale dhe lokale. Licencat që mundësojnë transmetimin e radiove në frekuenca të ndryshme janë të ndara sipas zonës së ofrimit të shërbimit dhe përfshijnë licencën e shërbimit dhe licencën për ndërtimin dhe operimin e rrjetit analog.
Zona e parë ofron mbulim për qarqet Tiranë dhe Durrës në frekuencat 98.2 dhe 90.9 MHz. Edhe licenca e dytë prek po këtë zonë, për frekuencat 89 MHz dhe 93.8 MHz. Dy licenca do të jepen edhe për transmetimin analog audio në qarkun e Vlorës; 1 licencë do të jepet për radio rajonale në veri të vendit për qarqet Lezhe, Shkodër dhe Kukës; 1 licencë mbulon qarqet Fier dhe Vlorë, ndërsa licenca e fundit për audio analoge lokale mbulon bashkitë Korçë dhe Devoll.
Gara do të jetë e hapur për aplikime nga subjektet e interesuara deri më datë 17 Korrik, ndërkohë që dokumentacioni i kërkuar mund të tërhiqet pranë AMA pas kryerjes së pagesës në Drejtorinë e Shërbimeve të Brendshme.
Pagesa për aplikimin me licencë transmetimi audio analoge lokale ose rajonale është 50 mijë lekë; ndërkohë që tarifa për marrjen e licencës së transmetimit është 15 mijë lekë.
Sakaq, pagesa vjetore për licencë transmetimi audio analoge llogaritet në bazë të numrit të popullsisë për zonën e mbulimit dhe varion nga 30 mijë lekë në vit për zonat deri në 75 mijë banorë dhe shkojnë deri në 500 mijë lekë në vit për zonat me popullsi mbi 2 milion banorë.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.