Hapet hoteli ku paguhet me ‘Bitcoin’ dhe mund të qëndrojnë vetëm sipërmarrësit
Ju keni dëgjuar për hapësirat e bashkëpunimit, por a do të dëshironit të ndanit hapësirën tuaj të fjetjes me sipërmarrës të tjerë?
Kjo është ideja prapa “Tribe Theory”, një “hotel aventurier” i ri me vendndodhje në Singapor, i cili synon veçanërisht sipërmarrësit.
I përbërë nga shtretër në formë kapsule dhe dhoma të përbashkëta fjetjeje, “Tribe Theory” nxjerr në pah një kategori të re të akomodimit duke kombinuar atmosferën shoqërore të një hosteli me kushtet komode të një hoteli si dhe me mjedisin bashkëpunues të sipërmarrësve.
Shtretërit kushtojnë rreth 26 $ për një natë dhe mysafirët janë të mirëpritur të paguajnë edhe me Bitcoin apo Ethereum (monedha virtuale).
“Ka shumë sipërmarrës që nuk kanë para, por kanë kriptovalutë dhe ne jemi të lumtur t’i pranojmë në hotelin tonë”, u shpreh themeluesi i “Tribe Theory”, Vikram Bharati.
Hoteli përmban një “hapësirë bashkëpunimi” në katin e fundit ku shërbehet mëngjesi, ka WiFi, gazeta ditore dhe shërbim lavanderie. Gjithashtu, nëpër korniza gjenden citate frymëzuese.
Bharati u shpreh se shpresonte që koncepti do të tërhiqte gjeneratën e re të sipërmarrësve, të cilët udhëtojnë në disa nga qendrat më të mëdha të biznesit në botë, por zakonisht nuk kanë para për të qëndruar në hotel. Kjo është veçanërisht e rëndësishme për sipërmarrësit që hyjnë në tregjet më pak të zhvilluara në Azinë Juglindore. Një natë në një hotel në Singapor kushton mesatarisht rreth 180 dollarë.
“Ajo që ne po përpiqemi të bëjmë, është të krijojmë një komunitet. Pra, jo vetëm të sigurojmë një shtrat me çmim të përballueshëm, por edhe të sigurojmë një mjedis bashkëpunimi me sipërmarrës nga e gjithë bota”, thotë Vikram.
“Dikush nga Kazakistani mund të takojë dikë nga Londra dhe të vendosin të bashkëpunojnë për bizneset e tyre, gjë që është shumë e vështirë nëse do të qëndronin në hotele”.
Bharati tregon se aktualisht po testohen strategjitë dhe beson se shumë shpejtë do të arrijnë tregun e synuar.
Ideja e “Tribe Theory” është në vetvete një sipërmarrje. Ideja lindi pasi Bahrati udhëtoi nëpër 50 vende të botës, dhe me ndihmën e gruas së tij, e ngriti hotelin në vetëm 3 muaj, duke shpenzuar rreth 45,000 dollarë.
Bharati synon edhe katër vende të tjera për të përhapur degët e biznesit të tij: Hong Kong, Tokyo, Berlin dhe Estoni. Estonia aktualisht po përpiqet të pozicionojë veten si qendër për sipërmarrjen dhe planifikon të prezantojë një “vizë digjitale nomade” vitin e ardhshëm.
Deri në fund të 2019, Bharati synon 10 qytete në 10 vende të ndryshme të botës.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.