Hapet linja telefonike për Ekstremizmin e Dhunshëm dhe qendra për Sigurinë dhe Paqen në Shqipëri
Ministria e Brendshme ka njoftuar hapjen e linjës telefonike për ekstremizmin e dhunshëm si dhe qendra për siguri dhe paqe në Shqipëri të cilat synojnë të parandalojnë dhe luftojnë radikalizimin fetar dhe ekstremizmin e dhunshëm në Shqipëri duke ofruar shërbime mbështetëse dhe këshillim, shërbime ri-integruese, ndërgjegjësimin e publikut, ngritje kapacitetesh për profesionistët dhe punë kërkimore.
Sipas njoftimit kushdo mund të telefonojë Linjën Telefonike Kombëtare për Ekstremizmin e Dhunshëm, nëse:
– Ndiheni i paqartë, i painformuar ose i rrezikuar nga ekstremizmi i dhunshëm;
– Një familjar është në proces radikalizimi dhe ju nuk dini si të veproni;
– Njihni dikë që mendoni se është në proces radikalizimi dhe mund të ketë nevojë për ndihmë dhe orientim;
– Jeni të shqetësuar për ndikimin e ekstremizmit të dhunshëm tek fëmijët tuaj dhe keni nevojë për këshillim;
– Shihni se fëmijët apo të afërmit tuaj navigojnë në faqe me përmbajtje ekstremiste;
– Jeni profesionist në fushën e edukimit dhe keni nevojë për ndihmë më të specializuar për të trajtuar me nxënësit fenomenin e ekstremizmit të dhunshëm;
– Jeni psikolog në shkolla, mësues apo çdo profesionist tjetër që dalloni tipare të ekstremizmit të dhunshëm tek një nga nxënësit;
– Jeni anëtar i këshillit të sigurisë vendore në lokalitetin tuaj
– Jeni aktivist i shoqërisë civile dhe gjatë punës tuaj në komunitet vëreni elemente të ekstremizmit të dhunshëm tek individë të caktuar;
– Keni nevojë për çdo lloj informacioni dhe bashkëpunimi në lidhje me radikalizmin dhe ekstremizmin e dhunshëm.
Në njoftim shkruhet gjithashtu se është nënshkruar marrëveshja e bashkëpunimit mes Ministrisë së Brendshme, Linjës së Këshillimit për Gra dhe Vajza, dhe Qendrës CVE, për funksionimin e Linjës Telefonike (mbështetur nga Ambasada e Shteteve të Bashkuara të Amerikës dhe Hedayah, përmes fondeve të Bashkimit Europian).
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.