Hapet qendra e parë për viktimat e dhunës seksuale, Manastirliu: Mbrojtje pa dallim
Ministria e Shëndetësisë dhe Mbrojtjes Sociale, në 16 ditët e aktivizimit kundër dhunës me bazë gjinore njoftoi hapjen e qendrës Lilium.
Kjo është e para qendër e menaxhimit të krizës për rastet e dhunës seksuale në Shqipëri, e cila do të ofrojë shërbim multidisiplinar për të gjithë të mbijetuarit nga dhuna seksuale. Ministrja e Shëndetësisë dhe Mbrojtjes Sociale Ogerta Manastirliu mori pjesë në inaugurimin e qendrës së re që do të trajtojë me të gjitha shërbimet, viktimat e dhunës seksuale.
“Qendra Lilium, që ka emrin e një luleje, është qendra e parë e menaxhimit të krizës për rastet e dhunës seksuale në Shqipëri, ku do të ofrohen shërbime të integruara për viktimat e dhunës seksuale” – tha Manastirliu.
Të gjitha shërbimet e kujdesit shëndetësor, ekzaminimi mjeko-ligjor, mbledhja e provave për ndjekjen e rastit nëpërmjet drejtësisë penale dhe shërbimet psiko sociale, ofrohen në të njëjtën kohë, në të njëjtin vend dhe nga profesionistë të specializuar veçanërisht për trajtimin e rasteve të dhunës seksuale.
“Për shkak të stigmës dhe mungesës së shërbimeve të specializuara, rastet e dhunës seksuale janë të nen raportuara por ne besojmë se me hapjen e kësaj qendre tashmë me standarde të certifikuara, do të kenë mundësi të marrin shërbim pa dallim dhe në anonimitet të plotë të gjithë viktimat e dhunës seksuale” – tha Manastirliu.
E financuar nga qeveria shqiptare në përmbushje të rekomandimeve të Konventës së Stambollit, Raportit të GREVIO-s dhe ligjit të ri për “Masat ndaj dhunës në marrëdhëniet familjare”, qendra Lilium është një qendër sipas standardeve europiane. Ajo ofron shërbimet nëpërmjet një ekipi multidisiplinar të përbërë nga: punonjës socialë, punonjës të policisë, infermierë, mjekë ligjorë, gjinekologë, pediatër, psikiatër, psikologë klinikë, punonjës të prokurorisë, avokatë, etj. Qendra LILIUM, është një qendër që ka si përparësi shëndetin dhe mirëqenien e të mbijetuarve nga dhuna seksuale, pavarësisht moshës, gjinisë, etnisë, grupit social, aftësisë së kufizuar, preferencës seksuale apo çdo lloj dallimi tjetër.
Gjatë inaugurimit të qendrës Lilium, merrnin pjesë edhe drejtori i UN Women në Shqipëri, zëvendësministret e Ministrisë së Brendshme dhe Ministrisë së Jashtme, mjekë dhe punonjës të specializuar që do të ofrojnë shërbimet multidisiplinare në këtë qendër.
Manastirliu theksoi se modele të tilla të qendrave që ofrojnë shërbime për viktimat e dhunës seksuale do të shtrihen në të gjithë vendin.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.