Hapet rruga për qeverinë e Draghit. Fiton lehtësisht votëbesimin në dhomën e ulët të parlamentit
Kryeministri i Italisë, Mario Draghi, fitoi lehtësisht votëbesimin në dhomën e ulët të parlamentit, që ishte hapi përfundimtar për qeverinë e tij të re që të nisë detyrën. Dhoma e deputetëve miratoi mocionin e votëbesimit me 535 vota pro dhe 56 kundër, me të djathtën ekstreme “Vëllezërit e Italisë” që ishte e vetmja parti e madhe kundër ish-presidentit të Bankës Qendrore Europiane. Draghi u betua javën e kaluar, pasi kriza politike bëri që paraardhësi i tij, Giuseppe Conte, të detyrohej të jepte dorëheqjen, prej dështimit të koalicionit në fuqi.
Draghi fitoi një ditë më parë votëbesimin në dhomën e lartë, Senatin, ku dha fjalimin e parë zyrtar si kryeministër dhe caktoi prioritetet politike, duke nisur një luftë të dyfishtë kundër krizës ekonomike dhe koronavirusit. Vendimi për të mbështetur Draghi ka copëtuar Lëvizjen 5-Yjet, partinë më të madhe në parlament, që u formua në vitin 2009 si një grup i protestave kundër institucioneve. Partia i’u bashkua qeverisë disa-partiake të Mario Draghi, por shumë votues dhe politikanë janë ende kundër idesë së mbështetjes së ish shefit të BQE.
Në votimin në dhomën e ulët, 16 nga 189 deputetë të Lëvizjes 5-Yjet, dolën nga binarët e partisë, duke votuar kundër Draghit dhe 15 nga 92 senatorët, bënë të njëjtën gjë në dhomën e lartë një ditë më parë. Një numër akoma më i vogël në të dy dhomat e parlamentit, abstenuan apo nuk u shfaqën për votimin.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.