Hapet tenderi për bypass-et e zvarritura – Fieri kërkon edhe 15 muaj punime, Vlora 27 muaj

Banka Europiane për Rindërtim dhe Zhvillim, ashtu siç kishte paralajmëruar më herët, ka hapur procedurat për tenderimin e kompanive vendase dhe të huaja që duan të vazhdojnë projektet e bypass-eve të Fierit dhe Vlorës.

Në një njoftim të orëve të vona të së martës, BERZH ka paraqitur edhe datën e mbylljes së këtij procesi, deri më 25 Tetor 2017, si dhe ka sqaruar për të interesuarit situatën aktuale.

Gjendja paraqitet më kritike në punimet për projektin e mbikalimit e Vlorës, i cili duhet të kishte përfunduar në 14 tetor të këtij viti. Kompania italiane “Serenissima” në 24 muaj, kishte zbatuar vetëm 12% të projektit dhe për këtë arsye ka ardhur edhe anulimi i tenderit nga Autoriteti Rrugor Shqiptar.

Mësohet se periudha e nevojshme e ndërtimit përfshin 27 muaj të tjerë punime, për aksin prej 29 km, i cili do të lidhë fundin e autostradës Fier-Vlorë, duke kaluar nga fshatrat Babicë dhe Kaninë përgjatë vijës së bregdetit, derisa të lidhet me rrugën ekzistuese Orikum-Sarandë.

Ndërkohë, nga projekti i bypass-it të Fierit mësohet se janë kryer 55% të punimeve që duhet të kishin mbaruar në tashmë. Periudha e mbetur e ndërtimit është 15 muaj.

Ky aks i gjatë 22 kilometra, lidh segmentin Lushnje-Fier me atë Levan-Vlorë dhe Levan-Tepelenë.

Fondet që do të përdorë qeveria për secilin projekt janë pjesa e mbetur nga kredia e BERZH dhe BEI. Kështu për Fierin janë në dispozicion 48.8 milionë euro, nga 60 milionë euro. Ndërsa, për Vlorën, qeveria do të përdorë 48 milionë eurot e mbetura.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.