Hapet tenderi për shëtitoren e Vlorës nga Fusha e Sportit deri te Tuneli! Projekti: 2 pishina publike, shatërvan e shkallare që zbresin në det!
Fondi Shqiptar i Zhvillimit ka hapur procedurën tenderuese për zgjedhjen e konsulentit për projektin e vazhdimit të Shëtitores së Vlorës, segmenti jugor nga fusha e sportit deri te tuneli. Projekti që zhvillohet nga Fondi Shqiptar i Zhvillimin me Bankën Botërore parashikon një fond limit 14 milion lekë.
Objektivi kryesor i projektit është është rritja e kapaciteteve të infrastrukturës urbane e turistike të zonës, si dhe krijimi i ambienteve çlodhëse e kreative
Zona ku do të zhvillohet projekti është e çrregullt dhe pa një shëtitore ku të shfrytëzohet bukuria e natyrës që e rrethon. Zona tjetër që është trotuari sipër rrugës automobilistike është në gjendje shumë të degraduar dhe shumë të rrezikshme për kalimin e këmbësorëve. Gjithashtu edhe largimi i ujërave të bardha nga rruga automobilistike bëhet në mënyrë primitive në tre pika shkarkimi në det pa asnjë infrastrukturë nëntokësore.
Ndërhyrjet e propozuara
Projektuesi duhet të analizojë të dhënat e të projektojë hapësirën e shëtitores dhe hapësirave publike me një sipërfaqe rreth 16,000 m2.
Referuar dokumenteve të tenderit, projekti parashikon krijimin e shëtitores së re nga fushat e sportit deri te tuneli prej 600ml në bregdet me qëllim krijimin e një pamjeje të bukur si dhe lidhjen hapësinore, funksionale e estetike ndërmjet fushave të sportit e shëtitores së ndërtuar në fazën e parë me tunelin. Shëtitorja do të ketë të njëjtat karakteristika si shëtitorja e ndërtuar më parë me një gjerësi prej 7m prej betoni me zall të bardh lumi. Po ashtu parashikohet të ketë ndriçim, gjelbërim (pisha të buta), stola dhe aksese me trotuarin e rrugës sipër.
Gjithashtu do të realizohet aksesi nga shëtitorja në det me anë të shkallareve që zbresin deri në det, të cilat do të shërbejnë edhe si mbrojtje detare. Përveç shëtitores projekti parashikon dhe krijimin e hapësirave publike në zonën e re që do të krijohet nga shëtitorja te rruga automobilistike. Konkretisht këto zona publike do të jenë si: ndërtimi i dy pishinave publike, dushe, ndërtimi i një shatërvani dhe i disa zonave plazhi, etj.
Pjesë e rëndësishme e projektit do të jetë ndërtimi i trotuarit të ri sipër rrugës automobilistike duke përfshirë sistemimin dhe largimin e ujërave të bardha të rrugës.
Hartimi i projektit duhet të realizohet në përputhje me kërkesat e detyrës së projektimit dhe do të bazohet në vëzhgimet e matjet topografike që do të kryhen në terren, studimet gjeologjike, hidrologjike, etj. Grupi i projektimit duhet të kryejë vlerësimin e gjendjes reale dhe të zgjidhë problematikat me qëllim realizimin e një projekti me standarde të larta.
Ndërhyrjet e propozuara në zonën e projektit, do të jenë:
-Punime për ndërtimin e shëtitores
-Punime për ndërtimin e hapësirave publike
-Ndërtimi i dy pishinave publike
-Ndërtimi i një shatërvani
-Ndërtimi i trotuarve të reja
-Ndërtimi i mureve mbajtëse poshtë trotuareve
-Ndërtimi i shkallareve të shëtitores
-Ndërtimi i mbrojtjes detare
-Zona kreative për fëmijët, familjet e të rinjtë, etj
-Punime për zgjidhjen e infrastrukturën mbitokësore e nëntokësore, si KUB, KUZ,
-Punime me ujësjellësin për furnizimin e pishinave, shatërvanit dhe dusheve
-Punime ndriçimi
-Punime sinjalistike
-Punime gjelbërimi
-Mobilim urban, dushe, stola, kosha mbeturinash, etj.
Afati për dorëzimin e ofertave është data 29 mars 2019 dhe pas shpalljes së fituesit projekti i zbatimit duhet të përgatitet e dorëzohet brenda një afati kohor prej 2 muajsh.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.