Hapet tenderi/ Pol i ri Administrativ në Bubq të Krujës. Detajet e projektit

Si pasojë e tërmetit të datës 26 Nëntor 2019, shumë objekte ndërtimore në rrethin Krujë u dëmtuan rëndë, duke u bërë të pabanueshme. Ndër to dhe zyrat e Njësisë administrative Bubq, Qendra Shëndetësore, Qendra Kulturore, posta etj.

Me qëllim rindërtimin e tyre, bashkia Krujë bazuar në Planin e Detyruar Vendor të hartuar në bashkëpunim me AKPT ka menduar që këto objekte t’i grupojë në një qendër të vetme, e cila do të quhet Poli i Ri Administrativ Bubq.

Ky objekt është ideuar dhe projektuar në dy nënobjekte të vendosura përballë njëra tjetrës, me nga dy Sektorë respektive, duke krijuar katër sektorë shërbimesh të grupuar në një Pol dhe të ndarë veçmas, me hyrje të veçanta.

Poli i Ri Administrativ Bubq do të ndërtohet në territorin e bashkisë Krujë, Njësinë Administrative Bubq. Njësia Administrative Bubq ndodhet në fshatin Bubq dhe ofron shërbime komplekse si Shërbime Publike, Bujqësi e Prona, shërbime për Gjendjen Civile, Ndihmës Ekonomike, Taksave Vendore etj. Mbulon nevojat e komuniteteve të Njësive Administrative Bubq, përfshirë fshatrat Bubq, Mazhe e Madhe, Mazhe e Vogël, Bilaj, Murqinë, Mallkuç, Budull, me synim lehtësimin e kushteve të shërbimit dhe situatës social-ekonomike si dhe përmirësimin e cilësisë së jetës së tyre.

Qendra Shëndetësore Bubq ndodhet në Bubq dhe ofron shërbime shëndetësore për banorët e Bubqit dhe Mazhes së Vogël por dhe shërbime shëndetësore të përqëndruara në rang Njësie. Stacioni Policor, është menduar të hapet rishtazi si zyrë, meqenëse kjo zonë ka një popullsi të konsiderueshme dhe do ti nevojitet domosdoshmërisht një Zyrë Shërbimi Policore.

Po ashtu është menduar të ndërtohet dhe një sallë mbledhjesh bashkëkohore(konferencash).

Gjithashtu është menduar të ndërtohet dhe qendra kulturore me të gjitha shërbimet komplekse të saj.

Poli i Ri Administrativ Bubq, shtrihet në pjesën perendimore të rrugës “Ura e Gjoles-Bubq-Ishëm”, në qendër të Bubqit.

Tenderi i shpallur nga Bashkia e Krujës ka një fond limit prej 238 milionë e 129 mijë lekë. Afati për dorëzimin e ofertave është 19 prill 2021.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.