Hapja e bizneseve – Në 7 muaj regjistrohen mbi 10 mijë sipërmarrje të reja
Krijimi i një klime të favorshme për biznesit është tashmë temë e çdo tryeze pune zyrtare. Por nisur nga statistikat zyrtare gjatë 7 mujorit të këtij viti pranë Qendrës Kombëtare të Biznesit janë regjistruar 10 645 biznese ose 19.34% më pak krahasuar me te njëjtën periudhë të 2016. Këto shifra janë bërë të ditur për SCAN nga Qendra Kombëtare e Biznesit.
Po sipas këtyre statistikave, gjatë 7 mujorit të vitit të kaluar numri i bizneseve të reja ishte 13 197. Edhe pse numri i bizneseve që hapen është i konsiderueshëm, numri i kërkesave për mbyllje aktiviteti në krahasim me një vit më parë ka rënë rreth 52.54%. Sipas statistikave të QKB, numri i çregjistrimeve për 7 mujorin e këtij vit llogaritet të jetë 2163 biznese, ndërkohë që në të njëjtën periudhë të një viti më parë ky numër ishte 4558.
Duke bërë një analizë të thjeshtë mund të themi se edhe aksioni ndaj informalitetit ka dhënë një efekt në këtë proces, ku shumë biznese të cilat kishin detyrime të papaguara nga administratës tatimore, kanë bërë kërkesë për t’i mbyllur, ndërkohë që janë hapur nën emra të tjerë. Aktualisht në të gjithë vendin janë funksionale dhe në shërbim të biznesit 33 zyra të QKB.
Ato janë të përqendruara në qytetet kryesore, ku dhe numri i bizneseve është më i madh. Vetëm një vit më parë Qendra Kombëtare e Biznesit nisi ofrimin e shërbimeve në mënyrë të përmbledhur, duke reduktuar burokracinë dhe kostot e biznesit dhe jo të ndara siç janë ofruar QKR dhe QKL. Puna për krijimin e kësaj qendre të vetme ka nisur që në vitin 2014, ndërsa parashikohet që në tërësi reforma për përmirësimin e klimës së të bërit biznes në Shqipëri të përfundojë plotësisht në fund të vitit 2017.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.