Hapja e negociatave, Meta nga Berlini: Shpresojmë në një vendim pozitiv të Komisionit

Shqipëria ka bërë progres në drejtim të procesit të integrimit europian. Kështu u shpreh Presidenti i Republikës, Ilir Meta i cili ishte i ftuar nderi i Bundestagut gjerman në Takimin e 23-të Ndërkombëtar të Berlinit.

Meta është shprehur më tej se shpreson që vendimi që pritet të merret pas dy javësh të jetë pozitiv si për Shqipërinë ashtu edhe për Maqedoninë.

“Vetëm dy javë na ndajnë nga vendimi i rëndësishëm që pritet të merret nga Këshilli Evropian për çeljen e negociatave të anëtarësimit të Shqipërisë në Bashkimin Evropian. Ne lutemi që ky vendim të jetë pozitiv si për ne, ashtu edhe për fqinjin tonë Maqedoninë. Brenda kësaj lutjeje qëndron dhe vetëdija e plotë për punën akoma më të madhe që duhet të bëjmë për të rritur cilësinë dhe standardet në të gjitha fushat e politikbërjes. Çelja e negociatave do të ishte një shtysë inkurajuese për adresimin edhe më të fortë të prioriteteve kyçe”, theksoi Presidenti Meta

Kreu i Shtetit theksoi në fjalën e tij se, sot paqja dhe stabiliteti janë të pranishme në rajonin tonë dhe kemi mundësinë historike për ta bërë atë të pakthyeshme.

Në këtë kuadër Meta u shpreh se shpresojmë që çështja mes Kosovës dhe Serbisë të përparojë drejt një zgjidhjeje përfundimtare të pranueshme për të dyja vendet.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.