Hapja e negociatave për në BE, Fleckenstein: Shpresoj që KE të nxjerrë rekomandim të pakushtëzuar
“Shpresoj që Komisioni Europian të nxjerrë një rekomandim të pa kushtëzuar për hapjen e negociatave të Shqipërisë”.
Kështu u shpreh në konferencën për mediat para largimit, europarlamentari Knut Fleckenstein. Sipas tij vendi ynë ka bërë progres sa për të merituar hapjen e negociatave edhe pse i mbetet shumë punë për të bërë në të ardhmen.
“Presim daljen e raportit të Komisionit Europian që nuk do të jetë vetëm për Shqipërinë por për të 6 vendet e rajonit. Ju mund ta imagjinoni sesa e rëndësishme është kjo periudhë si proces. Është një 6 mujor tejet i rëndësishëm, është momenti kur do të organizohet takimi i Sofjes që duhet të dalë me elementë konkrete për Ballkanin Perëndimor, do kemi raportin dhe do presim në qershor takimin e Këshillit Europian që shpresoj do të dalë me një vendim të qartë sa i përket rekomandimit të Komisionit. Opinioni i PE mbetet ai që ka qenë, presim nga KE të nxjerrë një rekomandim të qartë dhe jo të kushtëzuar për hapjen e negociatave për Shqipërinë. Mendojmë që janë bërë gjëra në proces që lejojnë hapjen e negociatave jo se çdo gjë është bërë. Themi që është bërë punë. Mbetet shumë punë për tu bërë në të ardhmen por shumë është bërë. Psh reforma në gjyqësor, vettingu etj që do na çonin në hapjen e negociatave”.
Fleckenstein renditi dy arsye se pse po largohet i lumtur këtë herë nga Shqipëria.
“Jam për dy gjëra i lumtur. Së pari për një gjë edhe pse pak e kushtëzuar, që ka një sinjal të qartë nga opozita se ata janë në favor të hapjes së negociatave. Ata mendojnë se është gjëja e duhur që duhet bërë tani. Dhe gjëja e dytë që jam vërtetë me mbresë është komisioni i posaçëm për ndryshimet në kodin zgjedhor. Kjo tregon edhe në këtë fazë të hershme që edhe opozita edhe shumica mund të bashkëpunojnë me njëri-tjetrin dhe natyrisht edhe kjo duhet mbështetur qoftë nga shoqëria këtu, qoftë nga PE”.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.