Hapja e shkollave do rritë infektimet – Rama, mësuesve e nxënësve: Jeni “çelsi” për të shmangur goditjen nga COVID-19
Kryeministri Edi Rama ka kërkuar bashkëpunimin e drejtuesve të shkollave, mësuesve dhe nxënëseve, që sipas tij janë “çelsi” për të evituar një goditje nga COVID-19. Gjatë një takimi të zhvilluar me nxënës dhe mësues të shkollës “Leonik Tomeo”, që është një institucion arsimor që pret edhe nxënësit e një shkollë të dëmtuar nga tërmeti i 26 nëntori, Rama tha se me hapjen e shkollave numri i të infektuarve do të rritet, ndaj kërkoi vigjilencë maksimale edhe jashtë ambienteve shkollore.
Teksa pesha kryesore e organizimit ka rënë pikërisht te drejtorët, ata thonë se procesi mësimor nuk do të jetë si më parë, por shkollat do të përpiqen për t’iu afruar sa më tepër normales.
Ndërkaq, duke qenë se mësimi do të zhvillohet me turne, nxënësit do të duhet të shikojnë listat që do të afishohen pranë shkollave, në mënyrë që të kuptojnë orarin e tyre.
Referuar protokollit, “detyrat” për nxënësin fillojnë që para hyrjes në ambiente e shkollës, ku përveç matjes së temperaturës, mbajtjes së distancës prej 1.5 m, duhet të jenë të pajisur me maskë me një përdorim ose mbrojtëse të fytyrës prej tekstili si dhe shami letre për higjienën e hundëve. Megjithatë, mbajtja e maskës gjatë mësimit për nxënësit e ciklit të ulët 9-vjeçar është vetëm e rekomandueshme, ndërsa për ciklin e lartë 9-vjeçar dhe të mesëm maska është detyrim. Gjatë qëndrimit në klasa protokolli kërkon që nxënësit të qëndrojnë të ulur nga një në bankë, ndërsa këto të fundit të kenë një distancë 1.5 m larg njëra-tjetrës.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.