Harito: Besimi në qeverisje është rritur, transparencë në shpenzimet buxhetore
Transparenca në shpenzimet buxhetore dhe në dhënien e koncesioneve shihen nga përfaqësuesit e qeverisë si një mënyrë për të rritur më tej besimin e qytetarëve në qeverisje. Një sondazh i kryer nga IDM tregoi një besueshmëri të ulët për organet e qeverisjes qendrore dhe vendore.
Por ministrja e Shtetit për Inovacionin dhe Administratën Publike, Milena Harito tha se besimi i qytetarëve ka ardhur në rritje krahasuar me vitin kur e majta u ngjit në pushtet në 2013-ën.
Nga ana e saj ambasadorja e Bashkimit Europian në Tiranë, Romana Vlahutin tha se reforma në drejtësi pritet të ndikojë pozitivisht tek qytetarët për rritjen e nivelit të besimit tek institucionet shqiptare. Ajo tha se disa persona po përpiqen ta pengojnë këtë reformë, por garantoi mbështetje të vazhdueshme të BE-së në këtë drejtim.
“E kuptoj frikën, e kuptoj skepticizmin. Njerëzit shohin çdo ditë se si ata e kundërshtojnë reformën dhe bëjnë gjithçka për ta parandaluar realizimin e saj. Se si ata përpiqen ta deligjitimojnë ata që janë duke punuar për reformën, duke përdorur metoda intimiduese nga regjimet e kaluara. Por nuk ka vend për frikë, nuk ka mundësi për të frikësuar atë që beson në nevojën që ka populli shqiptar për të pasur sistemin e drejtësisë që do. Ju nuk jeni vetëm dhe BE është këtu dhe do të jetë me ju”, theksoi Vlahutin.
Referuar sondazhit të IDM-së, 71 për qind e qytetarëve shprehen se reforma në drejtësi do të ketë një ndikim pozitiv dhe 46 për qind e tyre besojnë se do të zbatohet në mënyrë të plotë.
Florenc Drizari/ RTV SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.