Harta me vatrat e “nxehta” të COVID-19. 75% e rasteve të reja në 10 qytete, rriten ndjeshëm qytetarët aktivë me infeksionin

1023 raste të reja me COVID-19 u shënuan gjatë javës që lamë pas, sipas raportimit ditor të Ministrisë së Shëndetësisë, duke shënuar një rënie në raport me një javë më parë, ku u regjistruan 1098 raste. Sipas të dhënave të përpunuara nga TV SCAN Tirana mbetet qyteti me numrin më të lartë të infektuarve të rinj gjatë periudhës 14-20 shtator me 406 raste, thuajse i njëjti nivel me javën paraardhëse, me vetëm 5 raste më shumë.  Elbasani dhe Durrësi janë 2 qytetet e tjerë që kanë regjistruar më shumë të infektuar të rinj gjatë javës që lamë pas me 65 dhe 63 raste. Ndërkohë që, pas tyre vijnë Kruja me 39 raste, Shkodra me 36 raste dhe Lezha me 34 raste të reja.

Korça renditet në vendin e 7, sa i takon numrit të infektimeve të reja me 32 raste, duke shënuar një përpësim të ndjeshëm në krahasim me një javë më parë, ku u diagnostikuan 59 qytetarë të rinj me COVID-19.  Ndërkaq, Fieri, Berati dhe Vlora gjatë javës që lamë pas kanë regjistruar nga 31 raste të reja, duke u pozicionuar në 10 qytetet me numrin më të lartë të të infektuarve të rinj. Këto qytete zënë rreth 75% të të gjithë rasteve të regjistruar javën që shkoi, ndërkohë që pjesa tjetër prej 25%, ndahet mes 36 qyteteve të tjerë të vendit.

Sipas raportimeve zyrtare raste të rinj me COVID-19 u regjistruan në total në 46 qytete, çka do të thotë se në 15 bashki të tjera, të paktën prej 1 jave nuk raportohen raste të infektuarish të rinj. Megjithatë, ajo që bie në sy është fakti se në shumë prej qyteteve ku strukturat shëndetësore raportojnë raste të reja numërojnë vetëm nga 1 rast gjatë gjithë javës që lamë pas. Në total, deri të dielën në të gjithë vendin numërohen 5083 qytetarë të infektuar aktivë, një shifër që ka pësuar rritje në raport me një javë më parë ku numëroheshin 4450 qytetarë të infektuar me COVID-19.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.