Hendeku gjinor në gjetjen e punës. Krahasimi me Europën, ku renditet Shqipëria?
Nga SCAN INTELLIGENCE UNIT
Barazia gjinore është një prej temave globale më të diskutuara nga politika dhe shoqëria në ditët e sotme, sidomos sa i përket barazisë në punë. Bazuar në të dhënat e publikuara nga EUROSTAT dhe INSTAT, e të analizuara nga “Scan Intelligence Unit”, dallojmë qartazi se hendeku gjinor i punësimit është goxha i madh, madje në shumicën e vendeve europiane është dyshifror. Në pjesën dërrmuese të rasteve numri i meshkujve të punësuar është më i lartë se numri i femrave, për të njëjtin nivel arsimor. Si renditet Shqipëria në këtë aspekt krah vendeve të tjera të Europës?
Në terma të përgjithshëm, kemi paraqitur grafikisht masën totale të hendekut gjinor të punësimit në kontinentin tonë. Dallohet në mënyrë të theksuar se në vendin e parë është Turqia, e cila po të përkthejmë shifrat ka në total 36.2 pikë përqindje më shumë të punësuar meshkuj se sa femra. Në këtë klasifikim vendi ynë renditet në vendin e 10-të, me një normë hendeku gjinor prej 14 pikësh. Përsa i përket vendeve me hendekun më të vogël kemi: Lituaninë me 1.9, Finlandën me 2.9, Letoninë me 3, Norvegjinë me 4.5 dhe Suedinë 5 pikë përqindje.
Përveç të dhënave të përgjithshme mbi hendekun e punësimit, kemi trajtuar edhe hendekun në bazë të arsimimit të individëve, nga i cili vihet re një lidhje e drejtpërdrejtë, ku me rritjen e nivelit te arsimimit kemi ulje të hendekut gjinor të punësimit.
Hendeku gjinor i të punësuarve me arsim bazë
Konkretisht, për individët me nivel arsimi bazë, hendeku arrin vlerën maksimale në Maqedoninë e Veriut prej 39.7 pikë përqindje, më pas në renditje vijnë: Turqia me 39.2 pikë, Rumania me 33.4 pikë, Italia me 31.6, Malta me 31.5 dhe Greqia 29.3 pikë përqindje. Në këtë grup, Shqipëria renditet tek vendet me hendekun më të vogël me “vetëm” 13.3 pikë, ndërsa mesatarja e Bashkimit Europian është 21.3 pikë.
Hendeku gjinor i të punësuarve me arsim të mesëm
Në rastin e të punësuarve me arsimim të mesëm kemi një pamje deri diku të ngjashme me rastin e mëparshëm. Hendeku gjinor i punësimit, për këtë kategori shënon vlerën më të lartë në Turqi, prej 39.2 pikësh, më pas vjen Polonia me 23.4, Greqia me 20.8 dhe vendi ynë me një hendek prej 20.3 pikësh përqindje. Përsa i përket shteteve me hendekun më të vogël, kemi Portugalinë me 5.2 pikë, Gjermaninë me 5.3 dhe Luksemburgun me 6.4 pikë.
Hendeku gjinor i të punësuarve me arsim të lartë
Hendeku gjinor i të punësuarve ka përmbysje në rastin kur marrim në shqyrtim të punësuarit me arsim të lartë. Nga analiza e bërë, siç shihet edhe grafikisht, kemi dy shtete europiane, Portugalinë dhe Lituaninë, të cilat kanë një përmbysje të “traditës”, çka do të thotë se në këto dy vende numri i femrave, me arsim të lartë, të punësuara është më i madh se numri i burrave. Në Shqipëri hendeku për të punësuarit me arsim të lartë, shkon në vlerën 8.5 pikë përqindje, duke kaluar Turqinë me 22.3 pikë, Çekinë me 17.5 pikë, Hungarinë me 13.5 pikë, Sllovakinë me 11.4 pikë dhe Estoninë e Greqinë, perkatësisht me 10.5 dhe me 10.4 pikë përqindje. Mesatarja e Bashkimit Europan, në këtë kategori, është 6.1 pikë përqindje
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.