“Heqim taksën e Rrugës së Kombit”, Spaho premton në Kukës: Prioritet edhe biznesi i vogël

Nënkryetari i Partisë Demokratike, Edmond Spaho ka premtuar heqjen e taskës së Rrugës së Kombit, me ardhjen e kësaj partie në pushtet. Premtimi u bë gjatë takimit që Spaho zhvilloi me tregtarët e zonës, të cilës sipas PD-së, krahasa largimit të të rrinjve dhe rritjes së taksave, renditën këtë pagesë, si një prej arsyeve për rënien e konsumit.

“Prioriteti ynë, me ardhjen në pushtet nga vota e lirë e shqiptarëve, do të jetë heqja e taksës së Rrugës së Kombit, pasi kjo rrugë u ndërtua për të gjithë shqiptarët për një ekonomi më të zhvilluar dhe për të mos larguar banorët e Kukësit, Hasit dhe Tropojës.”- theksoi nënkryetari i PD, Edmond Spaho.

Spaho vuri në dukje edhe prioritetet e PD për rimëkëmbjen e ekonomisë, veçanërisht, të biznesit të vogël.

“Deri në 140 milionë lekë xhiro do të konsiderohet biznes i vogël, do të paguhet vetëm 0.5% të xhiros për të gjitha llojet e taksave. Do të vendoset pullën tek dera e dyqanit dhe nuk do të ketë më të drejtë tatimori për të ardhur këtu. Çdo biznes do të përfitojë nga sigurimet shoqërore. Nga 15% që paguan sot, do të paguajë 9%. Çmimi i energjisë elektrike nuk ka arsye pse të rritet. Përkundrazi, ne do ta ulim. Do të heqim akcizën e karburantit që të ulet çmimi me 300 lekë” tha ai.

Ndër të tjera, Spaho vuri në dukje se me ardhjen në pushtet, PD synon rikthimin e investitorëve të huaj, të cilët janë larguar nga Shqipëria për shkak të korrupsionit në nivelet më të larta të pushtetit dhe të taksave të larta.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.