Heqja e “roaming” mes Shqipërisë e Kosovës mund të firmoset në mbledhjen e përbashkët të qeverive me 28 nëntor në Pejë!
Me 28 nëntor, me rastin e përkujtimit të shpalljes së Pavarësisë së vendit, qeveritë e Shqipërisë dhe Kosovës do të vijojnë traditën e viteve të fundit të organizimit të mbledhjessë përbashkët. Takimi këtë vit është parashikuar të mbahet në Pejë.
Në listën e marrëveshjeve që pritet të nënshkruhen mes dy vendeve është dhe ajo për heqjen e “roaming” në komunikimet telefonike mes dy vendeve. Kryetari i Bordit të Autoritetit Rregullativ të Komunikimeve Elektronike dhe Postare, Kreshnik Gashi, në një intervistë për “Telegrafin” ka thënë se ARKEP-i, është i gatshëm ta zbatojë largimin e “roamingut”, mes Kosovës dhe Shqipërisë.
Gashi shprehet se qytetarët në sezonin e ardhshëm veror mund të flasin pa “roaming” nëse nënshkruhet marrëveshja më 28 nëntor ndërmjet Qeverisë së Kosovë dhe asaj të Shqipërisë. Për këtë qëllim, Gashi shprehet se është ngritur edhe një grup pune dhe synimi është nënshkrimi i një marrëveshje përfundimtare.
“Largimi i roamingut ndërmjet Shqipërisë dhe Kosovës është shumë i rëndësishëm dhe ARKEP është i gatshëm që ta zbatojë sa më shpejtë që të jetë i mundur. Çështja e marrëveshjes ndërshtetërore i takon Ministrisë së Zhvillimit Ekonomik, është themeluar një grup punues dhe ne në pjesën e Kosovës e kemi kryer një pjesë të madhe dhe kjo çështje do të diskutohet takimin e ardhshëm të dy qeverive që do të mbahet me 28 nëntor në Pejë dhe shpresojmë që aty të arrihet nënshkrimi i marrëveshjes finale në mënyrë që të fillohet me zbatimin i tërheqjes së roamingut ndërmjet Kosovës dhe Shqipërisë”, tha Gashi.
Artikulli i plotë: https://telegrafi.com/vitin-e-ardhshem-komunikimi-kosove-shqiperi-pa-roaming-video/
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.