Heqja e tabelave nga ARRSH, reagim me “komunikatë të jashtëzakonshme” OMONIA-PBDNJ: Provokim i rëndë, shkelje të drejtash

Autoriteti Rrugor Shqiptar ka hequr 35 tabela të cilat ishin vendosur jashtë standarteve të Kodit Rrugor. Tabelat ishin vendosur në rrugën kombëtare Qafë Muzinë – Sarandë – Konispol, me emertime të qendrave të banuara në gjuhën minoritare të zonës dhe shqipe.

Për më shumë lexo:

ARRSH heq 35 tabela në aksin Qafë Muzinë – Sarandë – Konispol: Ishin të kundraligjshme! Kishin emertime shqip dhe në gjuhën minoritare

Por ky veprim ka sjellë reagimin përmes një komunikate të jashtëzakonshme nga ana e organizatës OMONIA.

“Brenda errësirës së natës, mekanizmi shtetëror, nën mbulimin e një force të denjë të policisë, të Shtunën, 4 Maj, u vunë në lëvizje për të hequr tabelat e orientimit me emërtimet e fshatrave të komuniteteve helenike në njësi administrative nën kompetencën e Bashkisë së Finiqit, në zonën më gjerë të Sarandës.  Tabelat konkrete ishin vendosur kohët e fundit nga shërbimet e Bashkisë në fjalë që kishin ndërmarrë këtë akt plotësisht legal dhe të argumentuar me praktikat ligjore që i referohen Konventës Kuadër të Këshillit të Evropës për Mbrojtjen e Pakicave Kombëtare, dhe që përbën pas ratifikimit respektiv nga Parlamenti i Shqipërisë, pjesë të legjislacionit të brendshëm.

 Të nënvizohet fakti se vendosja e tabelave të kësaj natyre përbën detyrim të qeverisjes qendrore si për nga pikëpamja e përmbushjes së detyrimeve kontraktuale që rrjedhin nga praktika e sipërcituar, angazhimeve që Qeveria ka ndërmarrë kundrejt instrumenteve monitorues të Këshillit të Evropës në kuadrin e zbatimit praktik të së drejtës për përdorim publik të gjuhës amtare të Minoritetit Etnik Grek sikundër edhe sepse akset rrugore përbëjnë një të drejtë të qeverisë.

Hollësi që kërkon mëshimin e vet fakti se pjesë e rëndësishme e aksit rrugor qendror mbi të cilin u zbatua akti i mjeruar është ndërtuar gjatë viteve të mëparshme me financim të drejtëpërdrejtë të Qeverisë helenike” shkruhet në komunikatë.

Duke e cilësuar veprimin si shkelje të të drejtave të minoriteteve në Shqipëri, në deklaratë pretendohet se nëse “edhe supozojmë se Qeveria do të donte të ndryshonte formën e tabelave do të kishte hequr vetëm syprinat me mbishkrime që ato të korrigjoheshin, ndërkaq që ka shkulur krejt trupat e tyre”.

Po ashtu, evidentohet se tabelat “përbëjnë element pasuror të Bashkisë së Finiqit që ka financuar me procedura të rregullta dhe legale prodhimin dhe instalimin e tyre”.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.