Hetues të BKH, “Bum” aplikimesh – Hajnaj: 650 aplikime për t’u bërë pjesë e Byrosë. Përzgjedhja nën monitorimin e ndërkombëtarëve

Ndërsa përgjithësisht për organet e reja të drejtësisë ka pasur numër të ulët kandidaturash, e kundërta ka ndodhur në rastin e Byrosë Kombëtare të Hetimit.  Në fund të afatit të aplikimit për hetues në BKH, I cili u mbyll në orën 24 të së martë, rezulton se 650 persona kanë aplikuar për t’u bërë pjesë e kësaj trupe. Numri i aplikimeve është bërë public nga drejtuesja e BKH, Aida Hajnaj, e cila përmes një mesazhi falenderoi të gjithë të interesuarit për t’u bërë pjesë e këtij organi kycc në luftën kundër korrupsionit e krimit të organizuar.

Numri i kandidatëve të interesuar, që iu përgjigjën thirrjes për të aplikuar për këtë pozicion pune, në zbatim të Ligjit nr. 95/2016 “Për organizimin dhe funksionimin e institucioneve për të luftuar korrupsionin dhe krimin e organizuar” është mbi 650, sa më shpejt që të jetë e mundur do bëjmë saktësimet dhe do të njoftojmë numrin e saktë të kandidatëve që kanë aplikuar, shkruan Hajnaj.

Falenderoj edhe njëherë të gjithë kandidatët që kanë aplikuar, vijon më tej kreu I BKH, dhe ju garantoj që procesi i përzgjedhjes do të jetë një proces i drejtë, objektiv, transparent, dhe i barabartë, duke identifikuar kandidatët/et më të mirë, të cilët do të punojë ngushtësisht dhe nën drejtimin e Prokurorëve të Posaçëm për të hetuar veprat penale në fushën e korrupsionit dhe krimit të organizuar dhe do të garantojë një strukturë të pavarur nga çdo ndikim i paligjshëm, i brendshëm apo i jashtëm.

Procesi i përzgjedhjes do të asistohet dhe monitorohet nga afër nga Komisioni Ndërkombëtar i Ekspertëve që garanton transparencë dhe objektivitet maksimal në këtë proces.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.