Hidrocentrali i Kalivaçit – Fiton firma e ‘pezulluar’ nga gjykata për shkelje në mjedis. Reagon MIE
Bashkimi i Përkohshëm i Shoqërive “Ayen Enerji” dhe “Fusha” sh.p.k. janë shpallur fituese nga Ministria e Infrastrukturës dhe Energjisë për ndërtimin e hidrocentralit të Kalivaçit. Koncesioni parashikon ndërtimin e një HEC-i me kapacitetet të instaluar 111,000 kw mbi Vjosë, por ky projekt është kundërshtuar prej vitesh nga organizatat mjedisore për shkak të vlerave të larta natyrore të lumit.
Ai vlerësohet si një nga lumenjtë e fundit të egër të mbetur në Evropë, duke rrjedhur në mënyrë të natyrshme dhe të pandikuar në shumicën e gjatësisë së tij prej 270 kilometrash. Ndërkohë që, punimet i janë besuar një firme, që aktualisht është në proces gjyqësor për ndërtimin e hidrocentralit të Poçemit, mbi të njëjtin lumë. ’Ayen Enerji’, është pjesë e bashkimit të operatorëve ‘Kovlu Energy’, që është shpallur fituese për ndërtimin e hidrocentralit të Poçemit.
Por, punimet në këtë hidrocentral janë pezulluar nga Gjykata Administrative, e cila në argumentimin e vendimit është shprehur se procedura për deklaratën mjedisore nëpërmjet Vlerësimit të Ndikimit të Mjedis nuk ishte ndjekur sipas legjislacionit në fuqi. Sipas ekspertëve të mjedisit, gjatë hartimit të VNM-së së paraqitur nga kompania dhe miratuar nga Ministria e Mjedisit nuk janë ndërmarrë studime në terren, ndërsa raporti nuk përmban të dhëna lidhur me prezencën e specieve apo ndikimeve të mundshme në ujërat nëntokësor.
Ndërkaq, e kontaktuar nga TV SCAN Ministria e Infrastrukturës dhe Energjisë tha se çështja në fjalë është apeluar si vendim i padrejtë i gjykatës dhe se gjykata nuk ka hyrë në përmbajtjen e VNM-së për Poçemin, por është marrë me aspekte proceduriale. Ndërkohë që, për rastin e hidrocentralit të Kalivaçit tha se “procedura është bërë me njoftim në shtypin ndërkombëtar dhe ka qenë hapur”.
“Gjykimi bëhet mbi projektin konkret e jo mbi historikun”, shtoi MIE, duke garantuar se janë zbatuar të gjitha procedurat, sikurse përcakton legjislacioni në fuqi.
Ndërtimi i hidrocentralit të Kalivaçit u paralajmëruar para disa ditësh edhe nga ministri Damian Gjiknuri gjatë forumit për thithjen e investimeve të huaja. “Kalivaçi do të jetë një investim mbi 120 mln euro, krahas atij të Poçemit, në këtë kaskadë të pjesë së poshtme të Vjosës”,-tha Gjiknuri, ndërsa shtoi se do i qëndrojnë angazhimit zyrtar që nga Kalivaçi e sipër nuk do të ndërtohen hidrocentrale për shkak të sensibilitetit mjedisor.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.