Hipotekat, pengesë për tregun e pronave – Zaloshnja: Procedurat zvarriten për muaj, jo rrallë dështojnë shitjet
Zyrat e hipotekave, prej kohësh janë kthyer në një nga pengesat kryesore të tregut të pasurive të paluajtshme. Ilda Zaloshnja, agjente pasurish të paluajtshme, thotë se shumë shpesh një procedurë e thjeshtë në zyrat e hipotekave zvarritet deri në disa muaj, duke vënë shpesh në dyshim edhe realizimin e shitblerjes.
Emigrantët dhe të huajt që duan të blejnë prona në Shqipëri janë segmenti i tregut që e vuajnë më shumë zvarritjen e procedurave nga zyrat e regjistrimit të pasurive të paluajtshme.
Zaloshnja thotë se, zvarritja jashtë çdo kufiri i procedurave nga ana hipotekave përligj edhe akuzat e shumta për korrupsion nga ana e zyrtarëve të këtij institucioni.
Të enjten në mbrëmje, kryeministri Edi Rama u kërkoi dorëheqjen 35 drejtorëve të zyrave të regjistrimit të pasurisë në gjithë vendin. Menjëherë kanë ardhur dorëheqjet e para nga pesë zyra rajonale: Përkatësish nga hipotekat e Elbasanit, Fierit, Përmetit, Tepelenës e Gjirokastrës.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.