Hiqet referenca për taksën e infrastrukturës! Refuzimi i lejeve të ndërtimit, propozimi i qeverisë: Gjoba 300-500 mijë lekë
Qeveria ka amenduar ligjin e vitit 2014 për planifikimin dhe zhvillimin e territorit duke reflektuar jo vetëm ndryshimet që kanë ndodhur muajt e fundit me lejet e ndërtimit e planet zhvillimore por edhe disa procedura të reja. Me ndryshimet që propozohen, Plani i Përgjithshëm Kombëtar i Territorit do të jetë subjekt vlerësimi, në përshtatje me faktorët e rinj, socialë, ekonomikë dhe mjedisorë, të paktën në fund të çdo 5-vjeçari, në përputhje me kornizën kohore të Strategjisë Kombëtare të Zhvillimit të Integruar.
Aplikimi për leje ndërtimi duhet të kryhet përmes sistemit elektronik të lejeve të ndërtimit. Krahas këtyre ndryshimeve, qeveria ka parashikuar shtimin e një penaliteti që nuk parashikohet në ligjin ekzistues, duke përcaktuar se “refuzimi i lejes së ndërtimit në kundërshtim me legjislacionin e zbatueshëm dënohet me gjobë nga 300 000 lekë deri në 500 000 lekë”.
Ndryshimet e propozuara parashikojnë gjithashtu se “taksa e ndikimit në infrastrukturë nga ndërtimet e reja zbatohet për zhvillimet e reja që, sipas këtij ligji, kërkojnë pajisjen me leje ndërtimi dhe llogaritet sipas legjislacionit për sistemin e taksave vendore”.
Në ligjin ekzistues, parashikohet se “taksa e ndikimit në infrastrukturë nga ndërtimet e reja zbatohet për zhvillimet që, sipas këtij ligji, kërkojnë pajisjen me leje ndërtimi dhe llogaritet mbi çmimin referencë ose preventivin e investimit të ri që kërkohet të kryhet, duke përzgjedhur atë që ka vlerën më të lartë”.
Në këtë mënyrë, qeveria heq çmimet e referencës për përllogaritjen e taksës, duke ia lënë këtë të drejtë pushtetit vendor, i cili sipas ligjeve të reja të decentralizimit në kuadër të reformës administrative, do të jetë një burim i konsiderueshëm të ardhurash për njësitë e reja.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.