Histori spiunazhi / Serbia nis hetimin rreth videos ku shihet zyrtari rus duke i dhënë ryshfet agjentit serb

Presidenti serb Aleksandar Vucic urdhëroi një hetim të Mërkurën rreth një videoklipi që tregon me sa duket një oficer të inteligjencës ruse duke dorëzuar para një burri serb, në një incident që mund të tendosë marrëdhëniet normale dy-palëshe.

Një reporter hulumtues me seli në Bullgari, Christo Grozev, tha në llogarinë e tij në Twitter këtë fundjavë se klipi, i postuar në YouTube, tregon ndihmësin atashe ushtarak në ambasadën e Rusisë në Beograd duke takuar një agjent serb në një operacion të fshehtë.

Grozev tha se ai përdori softuerin Microsoft për njohjen e fytyrës për të identifikuar burrin rus që vesh një xhaketë lëkure të zezë. Klipi tregon dy burra duke përshëndetur ngrohtësisht njëri-tjetrin në Beograd, duke pirë birrë dhe duke shkëmbyer qese plastike. Serbi, fytyra e të cilit është errësuar, më vonë ulet në një makinë, merr një zarf nga çanta dhe numëron kartëmonedhat që ai përmban.

Zyrtarët rusë në Moskë dhe Beograd nuk kanë dhënë ende një koment.

Duke njoftuar vendimin e presidentit për të urdhëruar një hetim, Kryeministrja e Serbisë Ana Brnabic i tha të përditshmes serbe “Blic”: “Nëse kjo rezulton e vërtetë, kjo do të ishte një çështje serioze dhe një problem për ne.”

Burimi: Euronews

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.