Histori suksesi/ Si kjo vajzë arriti të kursente 100 mijë dollarë para se të mbushte 25 vjeç
Për shumë femra të moshës njëzet vjeçare, kursimi i parave, sidomos nëse jetojnë vetëm dhe u duhet të paguajnë fatura dhe shpenzime të tjera vetë, është një qëllim mëse i pamundur për t’u realizuar. Por rasti i 25 vjeçares Tori Dunlap mund t’iu ndihmojë të arrini këtë synim shumë më thjeshtë se sa do të kishit menduar. Ajo ka de-stigmatizuar mënyrën sesi femrat e këtij mijëvjeçari marrin pronësinë e financave të tyre duke arritur të kursejë një shumë prej 100 mijë dollarësh në më pak se tre vjet.
Dunlap, e cila i vendosi vetes synimin ekstrem 3 vite më parë, u frymëzua pasi lexoi një artikull për dikë që kishte bërë të njëjtën gjë. “Unë analizova numrat, bëra përllogaritjet dhe kuptova që do të ishte e mundur edhe për mua. Kështu që ishte një qëllim plotësisht arbitrar që vendosa për veten time,” tha ajo. “Mendova nëse dikush tjetër mund ta bëjë këtë, edhe unë mund ta bëj.”
Ajo përdori strategji të ndryshme për të kursyer para, duke përfshirë automatizimin e kursimeve të saja, duke përfshirë edhe heqjen mënjanë të 20 deri 50 dollarë në muaj, duke krijuar një fond urgjence si dhe duke investuar më herët për një llogari pensioni (e cila në këtë moshë nuk përfshin taksa).
Sot, pasi arriti qëllimin e saj, ajo po përpiqet të ndihmojë gratë e tjera të arrijnë qëllimet e tyre financiare me projektin e saj “100K e saj të Parë” (100 mijë dollarët e sajë të parë), një komunitet që ajo themeloi për gratë për t’i ndihmuar ato drejt suksesit financiar.
Në faqen e saj të internetit, ajo lobon fort për barazinë financiare të grave duke i ndihmuar ato të ndërtojnë pasuri dhe të dinë se çfarë/sa vlejnë.
Dunlap i mëson femrat e tjera se si të kursejnë dhe të buxhetojnë, të paguajnë borxhet, të kenë një mendim konkret për paranë, të negociojnë oferta apo rritje në detyrë në vendet e tyre të punës, të çmojnë veten si krijuese duke ndërtuar pse jo edhe markën e tyre personale.
Dhe, megjithëse nuk është një profesioniste e licencuar financiare ose e karrierës, shumë janë drejtuar tek Dunlap për këshilla dhe kanë ndjekur seancat e saj nëpër evente të ndryshme.
“Unë besoj se jam në këtë tokë për të luftuar për të drejtat financiare të grave. Kështu që nuk mendoj se kemi ndonjë lloj barazie, si njerëz të një grupi të margjinalizuar,” tha ajo. “Pavarësisht nëse janë gra, njerëz me ngjyrë, njerëz në komunitetin LGBT, nuk mendoj se ekziston ndonjë lloj barazie derisa të ketë barazi financiare.”
Këtu janë 3 këshilla nga Dunlap që mund t’iu ndihmojnë edhe ju gjithashtu të kurseni para:
- Investoni herët
“Kjo është ajo që rrit sasinë e parave tuaja,” thotë ajo. “Kjo është ajo që ju bën të pasur. Dhe çfarë ju jep mundësi, për sa i përket përvojave tuaja në jetë, dhe si dëshironi ta jetoni atë. ” Ajo gjithashtu thotë se investimi i zgjuar është veçanërisht i rëndësishëm për gratë e reja. Pra, ne kujdesemi shumë për hendekun e pagave me gratë, dhe kjo është diçka për të cilën duhet të vazhdojmë të kujdesemi dhe të flasim, “tha ajo. “Por gjëja për të cilën ne nuk po flasim është hendeku i investimeve, kështu që gratë ose presin më gjatë të investojnë se burrat ose nuk investojnë fare.”
- Krijoni një burim anësor
Për të fituar disa para më shumë për llogarinë tuaj të kursimeve, ju mund të merrni në konsideratë krijimin e një burimi anësor. Mund të jetë çdo gjë nga kthimi i hobi tuaj në një biznes për të fituar disa para më shumë ose mund të jepni orë mësimi në diçka që jeni të aftë ose kryeni shërbime për të tjerët kundrejt pagesës për vetëm disa herë në javë.
- Përdorimi 3 ‘Kovave’ në Rregullin e Buxhetit
Dunlap përdor atë që ajo e quan rregulli i buxhetit me tre ‘kova’ për të ndarë shpenzimet. “Kova e parë është e rezervuar për shpenzimet e jetesës së përditshme,” tha ajo. “E dyta për qëllime pensioni ose detyrimet e faturave të shtëpisë ose blerjes së saj, këto janë edhe dy kovat më të rëndësishme. Dhe pastaj çdo gjë që mbetet në të tretën është për “gjërat argëtuese“, si udhëtimi etj. ” Sigurisht sipas saj është gjithmonë më produktive fokusi tek shpenzimet që kanë përparësi. Pasi të vendosni çfarë është me prioritet në jetën tuaj dhe ju sjell kënaqësi, atëherë çdo gjë mund është e mundur.” (GMA)
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.