Huadhënia në Eurozonë – BQE: Rritet te ekonomitë familjare, tkurret për korporatat
Ritmi i rritjes së kreditit drejt ekonomive familjare në Eurozonë është përshpejtuar në normën më të lartë që prej vitit 2010 për muajin Shkurt, ndërsa huadhënia drejt korporatave është ngadalësuar, tregojnë të dhënat e fundit të Bankës Qendrore Europiane.
Huadhënia drejt ekonomive familjare në 19 vendet e valutës së përbashkët është rritur në 2.3% në muajin Shkurt me bazë vjetore, në krahasim me 2.2% që ishte në Janar, duke treguar normën më të lartë që prej Dhjetorit 2010.
Kjo tregon se paraja e lirë e Bankës me seli në Frankfurt, po e gjen rrugën drejt konsumatorëve.
Ndërkohë, rritja e kreditit te korporatat është ngadalësuar në 2% me bazë vjetore për Shkurtin, nga 2.3% që ishte në Janar, duke thyer trendin e kohëve të fundit.
Normat e ulëta të interesit dhe masat e stimujve kanë nxitur rritjen e kreditit në Eurozonë në dy vitet e fundit, gjë që cilësohet si suksesi më i madh i politikave lehtësuese monetare të Bankës Qendrore Europiane.
Rritja vjetore e agregatit monetar M3, që përveç shumës së agregatit M2, përfshin edhe marrëveshjet e riblerjeve (REPO), fondet e tregjeve të parasë, aksionet dhe letrat me vlerë të borxhit me maturim deri në 2 vite, arriti në 4.7% në muajin Shkurt, krahasuar me 4.8% që ishte në Janar.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.