Huamarrja e brendshme – Sistemi bankar mban peshën kryesore

Lëvizjet jo të favorshme në tregjet ndërkombëtare gjatë viteve të fundit,  si dhe për të  “zbutur” sadopak risqet, ka bërë që qeveria shqiptare  të  orientojë  huamarrjen drejt tregut vendas. Kështu referuar treguesve zyrtarë të borxhit publik, vihet re se peshën kryesore e mban huamarrja e brendshme.

Nga i gjithë  stoku i huamarrjes publike, i cili në fund të dhjetorit të vitit të kaluar, ishte 1 trilion e 87 miliardë lekë, pjesën më të madhe e mban huamarrja e brendshme,  e cila  kap vlerën e 577 miliardë  lekë.

Ndërsa borxhi i jashtëm  në fund të vitit rezulton të jetë  në shifrën 510 miliardë lekë.  Duke parë  dhe ndarjen e huamarrjes se brendshme vihet re se sistemi bankar mban dhe peshën kryesore me 60.96 %,  ndërsa institucionet financiare jo bankare  zënë 14.97 % të këtij borxhi.

Gjithashtu individët zënë një peshë jo të vogël në  nivelin e huamarrjes qeveritare më  14.86 %, ndërsa Banka Qendrore  ka një peshë prej 7.94 % të këtij borxhi.

Borxhi publik ka zbritur në 69.92 të Prodhimit të Brendshëm Bruto në fund të vitit të kaluar, ndërkohë që  në buxhetin e këtij viti, vetë qeveria parashikonte që borxhi të ulej në jo më pak se 69.1% të Prodhimit të Brendshëm Bruto, çka tregon se  financat publike po ruajnë  stabilitet.

Violeta Shqalsi/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.