Huamarrja në euro – Qeveria rikthen ankandet në muajin gusht

Qeveria shqiptare do të zhvillojë sërish muajin e ardhshëm një ankand të obligacioneve në euro. Më datë 17 gusht, Ministria e Financave do të ofrojë për shitje obligacione dyvjeçare në vlerën e 45 milionë eurove.

Prej disa vitesh, huamarrja në euro, sidomos në sezonin veror, është kthyer në një traditë. Qeveria kërkon të shfrytëzojë shtimin e likuiditetve të lira në euro gjatë kësaj periudhe, për të siguruar financime me norma më të ulëta interesi.

Edhe në relacionin e buxhetit të këtij viti, Ministria e Financave e ka paralajmëruar një zhvendosje të pjesshme të huamarrjes së brendshme drejt euros.

Në vitet e fundit, është regjistruar një rritje e ndjeshme e depozitave në euro, ndërsa kreditimi në monedhën europiane ka rënë.

Për bankat, investimi i fondeve të lira në euro është kthyer në një problem, në kushtet kur interesat e monedhës europiane në tregje janë praktikisht në vlera negative. Në këtë mënyrë, obligacionet qeveritare kanë rezultuar një zgjidhje e mirë për të investuar këtë likuiditet të tepërt.

Investimi i kursimeve në obligacionet qeveritare mund të jetë një alternativë e mirë edhe për individët, duke qenë se kthimet janë disi më të larta krahasuar me interesat e depozitave.

Ankandi i fundit i obligacioneve në euro u organizua më datë 20 janar të këtij viti.

Qeveria shiti obligacione për afro 40 milionë euro dhe kuponi ishte 0.8%, normë kjo shumë më e ulët krahasuar me obligacionet 2-vjeçare në lekë, që, në të njëjtën periudhë u emetuan me një kupon prej 3.8%.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.